ବିଜେଡ଼ି-ବିଜେପି ସମର୍ଥକଙ୍କ ମଧ୍ୟରେ ମାରପିଟ୍: ୩ ଆହତ, ଥାନାରେ ଏତଲା

ନୂଆପଡ଼ା: ନୂଆପଡ଼ା ଜିଲ୍ଲା କୋମନା ବ୍ଲକରେ ପ୍ରାକ୍ ନିର୍ବାଚନୀ ହିଂସା। ଆସନ୍ତା ୨୦ ତାରିଖରେ ଏହି ବ୍ଲକର ୨ ନମ୍ବର ଜିଲ୍ଲା ପରିଷଦ ଜୋନ୍‌ରେ ନିର୍ବାଚନ ହେବାକୁ ଥିବାବେଳେ ଏହା ପୂର୍ବରୁ ଘଟିଛି ହିଂସାକାଣ୍ଡ। କୁରୁମପୁରୀ ପଞ୍ଚାୟତରେ ପ୍ରଚାରକୁ ନେଇ ଦୁଇ ପ୍ରାର୍ଥୀଙ୍କ ସମର୍ଥକଙ୍କ ମଧ୍ୟରେ ମାରପିଟ୍ ହୋଇଛି ଏମାନେ ବିଜେଡି ଓ ବିଜେପିର ସମର୍ଥକ ବୋଲି ଜଣାପଡ଼ିଛି। ବିଜେଡି ପ୍ରାର୍ଥୀ ରାମନରେଶ ଅହିର ଓ ତାଙ୍କ ୨ ପୁଅ ଆହତ ହୋଇଥିବାବେଳେ ବିଜେପି ସମର୍ଥିତ ପ୍ରାର୍ଥୀ ଶଙ୍କର ପ୍ରସାଦ ଗୁପ୍ତା ମଧ୍ୟ ଆହତ ହୋଇଛନ୍ତି। ଗଣ୍ଡଗୋଳ ପାଇଁ ବିଜେପିକୁ ଦାୟୀ କରିଛି ବିଜେଡି। ଏହାସହ ଭୁବନେଶ୍ୱରରେ ଦଳୀୟ ନେତା, କର୍ମୀ ଓ ବିଧାୟକଙ୍କୁ ନେଇ ବିଜେଡି ବିକ୍ଷୋଭ ପ୍ରଦର୍ଶନ କରିଛି। ସେପଟେ ବିଜେଡ଼ିର ଅଭିଯୋଗକୁ ଖଣ୍ଡନ କରିଛି ବିଜେପି। ଅପରପକ୍ଷରେ ଉଭୟ ବିଜେଡି ଏବଂ ବିଜେପି ପକ୍ଷରୁ ଥାନାରେ ଏତଲା ଦାୟାର ହୋଇଥିବାବେଳେ ପୋଲିସ ମାମଲା ରୁଜୁ କରି ଘଟଣାର ତଦନ୍ତ କରୁଛି।