ମନରେଗା ଟଙ୍କା ବଣ୍ଟନକୁ ନେଇ ବୋମାମାଡ଼

ଆସିକା (ମନୋଜ ମୁନି): ମନରେଗା ଟଙ୍କା ବଣ୍ଟନକୁ ନେଇ ସାମାନ୍ୟ ବଚସାରୁ ହୋଇଛି ବୋମାମାଡ଼। ଏଥିରେ ଦୁଇ ଜଣ ଆହତ ହୋଇଛନ୍ତି। ଘଟଣାଟି ଘଟିଛି ଗଞ୍ଜାମ ଜିଲ୍ଲା ଆସିକାର ଗାଙ୍ଗପୁର ଥାନା ଅନ୍ତର୍ଗତ ପଣିବନ୍ଧ ଗାଁରେ।

ଆହତ ଦୁଇ ଜଣ ହେଲେ ଟୁକୁନା ସ୍ୱାଇଁ ଓ ଭୋଳା ସ୍ୱାଇଁ। ଟୁକୁନାଙ୍କ ଅବସ୍ଥା ଗୁରୁତର ଥିବାରୁ ତାଙ୍କୁ ବ୍ରହ୍ମପୁର ବଡ ମେଡିକାଲକୁ ସ୍ଥାନାନ୍ତର କରାଯାଇଛି। ଭୋଳାକୁ ଆସିକା ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରାଯାଇଛି।

ମିଳିଥିବା ସୂଚନା ଅନୁସାରେ, ଗତକାଲି ମନରେଗା ଟଙ୍କା ବଣ୍ଟନକୁ ନେଇ ଟୁକୁନାଙ୍କ ସହ ଭୋଳା ଓ ସନାତନଙ୍କର ବଚସା ହୋଇଥିଲା। ଏନେଇ ଟୁକୁନାଙ୍କ ଉପରେ ଉଭୟଙ୍କର ରାଗ ଥିଲା। ଆଜି ଟୁକୁନା ବଜାର ଯାଉଥିବା ବେଳେ ଭୋଲା ଓ ସନାତନ ମୁଖ୍ୟ ରାସ୍ତା କଡରେ ବୋମାମାଡ଼ କରିଥିଲେ। ଏଥିରେ ଟୁକୁନା ସହ ଭୋଳା ମଧ୍ୟ ଆହତ ହୋଇଥିଲେ।  ହେଲେ ସନାତନଙ୍କର କିଛି ହୋଇ ନଥିଲା।

ପ୍ରଥମେ ଉଭୟଙ୍କୁ ଆସିକା ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ପରେ ଟୁକୁନାଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ ବ୍ରହ୍ମପୁର ବଡ ମେଡିକାଲକୁ ସ୍ଥାନାନ୍ତର କରାଯାଇଛି।

 

 

 

 

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।