ମାଓବାଦୀ ଗୁଳି ମାରିଛନ୍ତି ଶୁଣି ଡରିଯାଇଥିଲେ, ତଥାପି ସାହସ ବାନ୍ଧି ଆଗକୁ ବଢ଼ିଲେ ଡାକ୍ତର

ବୌଦ୍ଧ(ଭାର୍ଜନ କୁମାର ପ୍ରଧାନ) ଆଗରୁ ହସ୍ପିଟାଲର ଚାରିକାନ୍ଥ ଭିତରେ ରୋଗୀଙ୍କୁ ଚିକିତ୍ସା କରୁଥିଲେ। ଜଙ୍ଗଲ ଭିତରେ  ମାଓ ଉପଦୃତ ଅଞ୍ଚଳରେ କେବେ ଚିକିତ୍ସା ଯୋଗାଇବାକୁ ପଡିବ ବୋଲି ଭାବି ନଥିଲେ। କିନ୍ତୁ ହଠାତ ଡାକରା ଆସିଲା ଡାକ୍ତରଙ୍କୁ । ଜଙ୍ଗଲ ଭିତରକୁ ଚିକିତ୍ସା ପାଇଁ ଯିବାକୁ ହେବ। ଦୁଇଜଣ ଯବାନ ମାଓବାଦୀ ଗୁଳିରେ ଆହତ ହୋଇଛନ୍ତି। ସେମାନଙ୍କୁ ତୁରନ୍ତ ପ୍ରାଥମିକ ଚିକିତ୍ସା ଆବଶ୍ୟକ। ଭୟ ଥିଲେ ବି କର୍ତ୍ତବ୍ୟ ଆଗରେ ସବୁ ତୁଚ୍ଛ ପାଲଟିଯାଇଥିଲା। ଆଉ କାଳ ବିଳମ୍ବ ନକରି  ମାଓବାଦୀ ଘେରି ରହିଥିବା ଜଙ୍ଗଲକୁ ବାହାରି ପଡ଼ିଥିଲେ। ସେ ହେଉଛନ୍ତି ଶନିବାର ଆହତ ଯବାନଙ୍କୁ ପ୍ରାଥମିକ ଚିକିତ୍ସା ଯୋଗାଇଥିବା ଓ ରାଜ୍ୟ ପୁଲିସ ମୁଖିଆଙ୍କ ଦ୍ୱାରା ପ୍ରଶଂସିତ ହୋଇଥିବା କଣ୍ଟାମାଲ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରର ଡାକ୍ତର ଜଗଦୀଶ ସେଠୀ। ଶନିବାର ଘଟଣା କେତେ ଗୁରୁତ୍ୱପୂର୍ଣ୍ଣ ଥିଲା  ସେ ବିଷୟରେ ଡାକ୍ତର ସେଠୀ ନିଜ ଅନୁଭୂତି ବଖାଣିଛନ୍ତି।

ଶନିବାର ସକାଳ ୮ ଟା।  କଣ୍ଟାମାଲ ଥାନାରୁ ଖବର ଆସିଲା। ମାଓବାଦୀଙ୍କ ଆକ୍ରମଣରେ ୨ ଜଣ ଯବାନ ଆହତ ହୋଇଛନ୍ତି। ସେମାନଙ୍କୁ ଚିକିତ୍ସା ଆବଶ୍ୟକ। ଥାନାରୁ ଖବର ପାଇ ଡାକ୍ତର ସେଠୀ ତାଙ୍କ ମେଡିକାଲ ଟିମକୁ ନେଇ ଘଣ୍ଟାପଡା ଅଭିମୁଖେ ବାହାରିଥିଲେ। ଘଣ୍ଟାପଡା ପହଁଚିବା ପରେ ସେଠାରେ ପ୍ରସ୍ତୁତ ଥିବା ଆମ୍ବୁଲାନ୍ସରେ ଡାକ୍ତର ଓ ତାଙ୍କ ଟିମ ସହ ସୁରକ୍ଷାକର୍ମୀ ଉମା ଜଙ୍ଗଲ ଆଡକୁ ଯାଇଥିଲେ। କିଛି ବାଟ ଯିବା ପରେ ଆଗକୁ ଆମ୍ବୁଲାନ୍ସ ଯିବା ପାଇଁ ରାସ୍ତା ନଥିଲା। ସେଠାରେ ଆମ୍ବୁଲାନ୍ସ ରଖି ସୁରକ୍ଷାକର୍ମୀଙ୍କ ସହ ଚାଲି ଚାଲି ଜଙ୍ଗଲ ଭିତରକୁ ଚାଲିଲେ।

ରାସ୍ତାରେ ଖବର ମିଳିଲା କେନ୍ଦ୍ରୀୟ ରିଜର୍ଭ ଫୋର୍ସର ସୁରକ୍ଷାକର୍ମୀ ଆହତ ଯବାନଙ୍କୁ ବାଇକ ଓ ଷ୍ଟ୍ରେଚରରେ ଆଣୁଛନ୍ତି। ରାସ୍ତାରେ ଅପେକ୍ଷା କରିବା ସହ ଆହତ ଯବାନ ପହଁଚିବା ପରେ ସେମାନଙ୍କୁ ଆମ୍ବୁଲାନ୍ସକୁ ଆଣିଥିଲେ। ଜଣେ ଯବାନଙ୍କ ଛାତି ଓ ଅନ୍ୟ ଜଣେ ଯବାନଙ୍କ ଆଖି ପାଖରେ ଗୁଳି ବାଜିଥିଲା। ରକ୍ତସ୍ରାବ ଯୋଗୁ ସେମାନେ ନିଃଶ୍ଵାସ ନେବାରେ ଅସୁବିଧା ହେଉଥିଲା ଓ ଦୁର୍ବଳ ଅନୁଭବ କରୁଥିଲେ। ଆମ୍ବୁଲାନ୍ସ ଭିତରେ ପ୍ରାଥମିକ ଚିକିତ୍ସା ଦେଇ ଘଣ୍ଟାପଡା ଅଭିମୁଖେ ଆଣିଥିଲେ।  ଆମ୍ବୁଲାନ୍ସ ପହଁଚିବା ବେଳକୁ ଘଣ୍ଟାପଡା ହାଇସ୍କୁଲ ପଡ଼ିଆରେ ଡିଜି ଅଭୟ ଓ ଆଇଜି(ଅପରେସନ) ଅମିତାଭ ଠାକୁର ହେଲିକପ୍ଟର ସହ ଅପେକ୍ଷା କରିଥିଲେ। ବୌଦ୍ଧରେ ଦୁଇ ଯବାନ ଆହତ ଖବର ପାଇ ସେମାନେ ନିଜ କୋରାପୁଟ ଗସ୍ତ ବାତିଲ କରି ଘଣ୍ଟାପଡା ପହଞ୍ଚିଥିଲେ। ଘଟଣାର ଅନୁଧ୍ୟାନ କରିବା ସହିତ ସେଠାରେ ଗୁରୁତର ଦୁଇ ଯବାନଙ୍କୁ ହେଲିକେପ୍ଟରରେ ଧରି ଡିଜିପି ଅଭୟ ଓ ସେ ମଧ୍ୟ ଭୂବନେଶ୍ୱର ଏମ୍ସକୁ ଯାଇଥିଲେ ବୋଲି ଡାକ୍ତର ସେଠୀ କହିଛନ୍ତି। ଆଜି ଉଭୟ ଯବାନଙ୍କ ଖବର ନେଇଥିଲେ, ଉଭୟଙ୍କ ସ୍ଵସ୍ଥବସ୍ଥାରେ ଉନ୍ନତି ହେଉଥିବା ସେ କହିଛନ୍ତି। ଡାକ୍ତରଙ୍କ ଏହି ଉଦ୍ୟମ ଓ ତ୍ୱରିତ ପଦକ୍ଷେପ ପାଇଁ ରାଜ୍ୟ ପୁଲିସ ମୁଖିଆ ବହୁ ପ୍ରଶଂସା କରିଛନ୍ତି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।