ଭୁବନେଶ୍ୱର (ଓଡ଼ିଶା ରିପୋର୍ଟର): ମୟୂରଭଞ୍ଜ ଜିଲ୍ଲା କୁଳିଅଣାରୁ ୩ କେଜି ୨୮୫ ଗ୍ରାମ ବ୍ରାଉନସୁଗର ଜବତ କରାଯାଇଛି। ଆଜି ଭୋରରୁ କ୍ରାଇମବ୍ରାଞ୍ଚ ଏସଟିଏଫ୍ ଟିମ୍ ଚଢଉ କରି ଏହି ବ୍ରାଉନସୁଗର ଜବତ କରିଛି। କ୍ରାଇମବ୍ରାଞ୍ଚ ଏଡିଜି ସୌମେନ୍ଦ୍ର ପ୍ରିୟଦର୍ଶୀ ସାମ୍ବାଦିକ ସମ୍ମିଳନୀରେ ଏହି ସୂଚନା ଦେଇଛନ୍ତି।
ସେ କହିଛନ୍ତି, ଜବତ ବ୍ରାଉନସୁଗରର ମୂଲ୍ୟ ୩ କୋଟି ଟଙ୍କାରୁ ଅଧିକ ହେବ। ଏହି ଘଟଣାରେ ଜଣେ ଅଭିଯୁକ୍ତକୁ ଗିରଫ କରାଯାଇଛି। ଗିରଫ ଅଭିଯୁକ୍ତ ଜଣକ ବ୍ରାଉନସୁଗର ଡିଲର। ଗୁଇନ୍ଦା ବିଭାଗର ରିପୋର୍ଟ ଆଧାରରେ ଏହି ଚଢଉ କରାଯାଇଥିଲା।
ସେ ଆହୁରି କହିଛନ୍ତି ଯେ, ଏହି ନିଶା ବେପାରର ଚେର କେଉଁଆଡ଼େ ଲମ୍ବିଛି, ତାହାର ତଦନ୍ତ ଚାଲିଛି। ଏହି ନେଟଓ୍ୱର୍କରେ କେତେ ନିଶା ବେପାରୀ କାମ କରୁଛନ୍ତି, ସେ ନେଇ କ୍ରାଇମବ୍ରାଞ୍ଚର STF ଖୋଳତାଡ଼ କରୁଛି।
୨୦୨୦ ମସିହାରେ ଏପର୍ଯ୍ୟନ୍ତ ୧୫ କେଜି ୬୪୮ ଗ୍ରାମ ବ୍ରାଉନସୁଗର ଜବତ ହୋଇଥିବା ବେଳେ ୪୦ ଜଣ ଗିରଫ ହୋଇଛନ୍ତି। ଆଗକୁ ମଧ୍ୟ ଚଢ଼ଉ ଜାରି ରହିବ ବୋଲି କ୍ରାଇମବ୍ରାଞ୍ଚ ଏଡିଜି କହିଛନ୍ତି।
ଆଜି କ୍ରାଇମବ୍ରାଞ୍ଚ STF ବ୍ରାଉନସୁଗର ଜବତ କରିଥିବା ଟ୍ୱିଟ୍ କରି ସୂଚନା ଦେଇଥିଲେ ପୁଲିସ ଡିଜି ଅଭୟ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।