ନଭେମ୍ବର ପହିଲାରୁ ବସ୍‌ ବନ୍ଦ ପାଇଁ ମାଲିକଙ୍କ ଧମକ

ଭୁବନେଶ୍ୱର (ଓଡ଼ିଶା ରିପୋର୍ଟର): ନଭେମ୍ବର ୧ ତାରିଖରୁ ରାଜ୍ୟରେ ଗଡ଼ିବନି ଘରୋଇ ବସ୍ । ୫ ଦଫା ଦାବି ପୂରଣରେ ସରକାରଙ୍କ କାଳକ୍ଷେପଣ ନୀତି ପ୍ରତିବାଦରେ ରାଜ୍ୟ ଘରୋଇ ବସ୍ ମାଲିକ ସଂଘ ଏହି ନିଷ୍ପତ୍ତି ନେଇଛି। ଏ ସଂପର୍କରେ ସଂଘ ପକ୍ଷରୁ ଏକ ସାମ୍ବାଦିକ ସମ୍ମିଳନୀରେ କୁହାଯାଇଛି ଯେ, ଚେକ୍ ଗେଟ୍ ଜରିଆରେ ଟଙ୍କା ଆଦାୟ ଓ ଟିକସ ବୃଦ୍ଧି, ପୋଲିସ୍ ଚେକିଂ ଭଳି ପ୍ରସଙ୍ଗ ସହ ଭଡ଼ା ବୃଦ୍ଧି ସମେତ ୫ ଦଫା ଦାବି ପୂରଣ ନେଇ ପୂର୍ବରୁ ସରକାରଙ୍କୁ ସ୍ମାରକପତ୍ର ଦିଆଯାଇଥିଲା। ହେଲେ ଏପର୍ଯ୍ୟନ୍ତ ଦାବି ପୂରଣ ଦିଗରେ କୌଣସି ପଦକ୍ଷେପ ନିଆଯାଇ ନାହିଁ। ତେଣୁ ବାଧ୍ୟ ହୋଇ ଆସନ୍ତା ୧ ତାରିଖରୁ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ରାଜ୍ୟର ସମସ୍ତ ଘରୋଇ  ବସ୍ ଚଳାଚଳକୁ ବନ୍ଦ କରିବା ପାଇଁ ସାଧାରଣ ପରିଷଦ ବୈଠକରେ ନିଷ୍ପତ୍ତି ହୋଇଥିବା ସଂଘ ପକ୍ଷରୁ କୁହାଯାଇଛି।