ଖୋର୍ଦ୍ଧା(ବଳରାମ ଲେଙ୍କା): ହାଇଦ୍ରାବାଦରୁ କୋଲକତା ଅଭିମୁଖେ ଯାଉଥିବା ଏକ ସିଗାରେଟ୍ ଭର୍ତ୍ତି କଣ୍ଟେନର ଗତ ରାତିରେ ଟାଙ୍ଗୀ ଥାନା ଅନ୍ତର୍ଗତ ୧୬ ନମ୍ବର ଜାତୀୟ ରାଜପଥରେ ଲୁଟ୍ର ଶିକାର ହୋଇଥିଲା। ଲୁଟେରାମାନେ କଣ୍ଟେନରରେ ଥିବା ଆଇଟିସି କମ୍ପାନୀର ସମସ୍ତ ଦାମୀ ସିଗାରେଟ୍ ଲୁଟି ନେଇଥିବା ଅଭିଯୋଗ ହୋଇଛି। ସେମାନେ କଣ୍ଟେନର ଡ୍ରାଇଭରଙ୍କ ହାତ ଗୋଡ଼ ବାନ୍ଧି ଜଙ୍ଗଲରେ ଫୋପାଡ଼ି ଦେଇ ପଳାଇଥିଲେ। ଆଜି ସକାଳେ ସ୍ଥାନୀୟ ଲୋକେ ଚାଳକଙ୍କୁ ଜଙ୍ଗଲରୁ ଉଦ୍ଧାର କରିବା ପରେ ଘଟଣା ସମ୍ପର୍କରେ ଜଣାପଡ଼ିଛି।
ଗତକାଲି ବିଳମ୍ବିତ ରାତିରେ ସିଗାରେଟ୍ ଭର୍ତ୍ତି କଣ୍ଟେନରଟି ୧୬ ନମ୍ବର ଜାତୀୟ ରାଜପଥରେ ଯାଉଥିବା ବେଳେ କିଛି ଲୁଟେରା ଗାଡ଼ିଟିକୁ ଅଟକାଇଥିଲେ। ଏହାପରେ ବନ୍ଧୁକ ଦେଖାଇ ଚାଳକ ସହ ଗାଡିଟିକୁ ଉଗ୍ରତାରା ଜଙ୍ଗଲକୁ ନେଇଯାଇଥିଲେ। ସେଠାରେ ହାତଗୋଡ଼ ବାନ୍ଧି ଚାଳକକୁ ପିଙ୍ଗି ଦେଇଥିଲେ ଓ ସିଗାରେଟ୍ ଭର୍ତ୍ତି କଣ୍ଟେନର ନେଇ ଛୁ ମାରିଥିଲେ। ଆଜି ସକାଳେ ସ୍ଥାନୀୟ ଲୋକେ ଚାଳକଙ୍କୁ ଜଙ୍ଗଲରୁ ଉଦ୍ଧାର କରିଥିଲେ।
ଖବର ପାଇ କଇଥାପାଲିରୁ ଖାଲି କଣ୍ଟେନରଟିକୁ ପୁଲିସ୍ ଜବତ କରିଛି। ଏନେଇ ଟାଙ୍ଗୀ ଥାନାରେ ମାମଲା ରୁଜୁ କରାଯାଇଛି। ପୁଲିସ୍ ଘଟଣାର ତଦନ୍ତ କରୁଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
