ବରଗଡ଼ ଧନୁଯାତ୍ରାର ଆଜି ୬ଷ୍ଠ ଦିବସ

ବରଗଡ଼: ବରଗଡ଼ ଧନୁଯାତ୍ରାର ଆଜି ୬ଷ୍ଠ ଦିବସ। ବରଗଡ଼ର ମୁକ୍ତାକାଶ ରଙ୍ଗମଞ୍ଚରେ ଜାରି ରହିଛି କଂସ ରାଜଙ୍କ ରାଜୁତି ସହ କୃଷ୍ଣ ଭଗବାନଙ୍କ ବାଲ୍ୟ ଲୀଳା। ସୋମବାର ପଞ୍ଚମ ଦିନରେ ଗୋପବାଳାଙ୍କ ସହ କୃଷ୍ଣ-ବଳରାମ ଯମୁନାନଦୀ କୂଳରେ ବଣଭୋଜି କରିଛନ୍ତି। ନଟନାଗର ନିଜ ହାତରେ ଗୋପିମାନଙ୍କୁ ବିଭିନ୍ନ ସୁସ୍ୱାଦୁ ଭୋଜନ ବାଣ୍ଟିଥିଲେ। ଦଧି ଚୋରି ଆକଟ କରିବାକୁ ଯାଇ ମାତା ଯଶୋଦାଙ୍କ ଦ୍ୱାରା କୃଷ୍ଣବନ୍ଧନ ଏବଂ କାଳିୟା ନାଗ ଦଳନ ଇତ୍ୟାଦି ଲିଳା ପରିବେଷଣ କରାଯାଇଥିଲା। ମହାରାଜ କଂସଙ୍କର ନଗର ଭ୍ରମଣ ଜାରି ରହିଛି। ସୈନ୍ୟ ସାମନ୍ତ ଗହଣରେ ରାଜରାସ୍ତାରେ ଗଲାବେଳେ ବାଟରେ ବିଶୃଙ୍ଖଳିତ ପ୍ରଜାମାନଙ୍କୁ ଦଣ୍ଡ ବି ଦେଉଛନ୍ତି। ରଙ୍ଗମହଲରେ ନୃତ୍ୟ ଗୀତର ଆସର ଜମୁଛି।

ଆଜି ୬ଷ୍ଠ ଦିନରେ କଂସ ମହାରାଜଙ୍କ ରାଜ ଦରବାରରେ ଅତିଥି ଅଭ୍ୟାଗତଙ୍କ ଭିଡ ଜମିବ। ରଙ୍ଗସଭା ପରେ କୃଷ୍ଣ-ବଳରାମଙ୍କ ହତ୍ୟା ପାଇଁ ଷଡଯନ୍ତ୍ର ରଚାଯିବ। ଗୋପପୁରରେ ଆଜି ଯମୁନାକୁ ସ୍ନାନ ପାଇଁ ଯାଇଥିବା ଗୋପାଙ୍ଗନାଙ୍କ ବସ୍ତ୍ରହରଣ କରିବେ ଶ୍ରୀକୃଷ୍ଣ।