ତେଲ ତାତି ଧୋଇନେଲା ଫ୍ଲାଏ ଓଭର ଟ୍ରାଜେଡ଼ି ଆଲୋଚନା: ବିଜେପି କହିଲା ଉଭୟଙ୍କ ଭିତରେ ହୋଇଛି ଡିଲ୍

ଭୁବନେଶ୍ୱର (ଓଡ଼ିଶା ରିପୋର୍ଟର): ବିଧାନସଭାରେ ତେଲ ତାତି ଆଜି ଧୋଇଦେଲା ଓଭରବ୍ରିଜ୍ ଭୁଶୁଡ଼ିବା ଆଲୋଚନା। କଂଗ୍ରେସ୍ ବିଧାୟକଙ୍କ ହଙ୍ଗାମା ଯୋଗୁଁ ଏହା ଆଲୋଚନାକୁ ଆସିପାରିଲା ନାହିଁ। ତୈଳ ଦର ବୃଦ୍ଧି ନେଇ କେନ୍ଦ୍ର ବିରୋଧରେ ଆଜି  ବିଧାନସଭାରେ ଉଭୟ କଂଗ୍ରେସ୍ ଓ ବିଜେଡିର ସ୍ୱର ଥିଲା ଏକ।

ସ୍ୱାଭାବିକ ଥିଲା ପ୍ରଶ୍ନକାଳ। ସୁରୁଖୁରୁରେ ଚାଲିଲା ୫୮ ମିନିଟ୍ ଆଲୋଚନା। ହେଲେ ପ୍ରଶ୍ନକାଳ ସରିବାର ୨ ମିନିଟ୍ ପୂର୍ବରୁ କିନ୍ତୁ ବଦଳିଗଲା କଂଗ୍ରେସ୍ ବିଧାୟକଙ୍କ ମୁଡ୍। କେନ୍ଦ୍ର ବିରୋଧରେ ସ୍ଳୋଗାନ ଦେଇ ଗୃହ ମଧ୍ୟଭାଗକୁ ଆସି କଲେ ହଟ୍ଟଗୋଳ। ବିଜେଡି ବିଧାୟକମାନେ ବି ନିଜ ଆସନରେରେ ଛିଡ଼ା ହୋଇ କେନ୍ଦ୍ର ସରକାରଙ୍କ ବିରୋଧରେ ସ୍ଳୋଗାନ ଦେଇଥିଲେ। ହୋହଲ୍ଲା ଯୋଗୁଁ ଗୃହକୁ ଅପରାହ୍ନ ୩ ଯାଏଁ ମୁଲତବି କରିଦେଲେ ବାଚସ୍ପତି। ଫଳରେ କଂଗ୍ରେସ୍ ବମିଖାଲ ଓଭରବ୍ରିଜ୍ ଭୁଶୁଡ଼ିବା ନେଇ ଦେଇଥିବା ମୁଲତବୀ ନୋଟିସ୍ ଉପରେ ଆଲୋଚନା ହୋଇପାରିଲା ନାହିଁ। ଏଥିପାଇଁ ଉଭୟ କଂଗ୍ରେସ୍ ଓ ବିଜେଡିକୁ ଦାୟୀ କରିବା ସହ ଉଭୟଙ୍କ ଭିତରେ ଡିଲ୍ ହୋଇଥିବା ଅଭିଯୋଗ ଆଣିଛି ବିଜେପି।