ଭୁବନେଶ୍ୱର(ଓଡ଼ିଶା ରିପୋର୍ଟର):ମଝିରେ ଆଉ ଦିନେ । ମାତୃଭାଷା ପେପର୍ ସହ ଆସନ୍ତା ବୁଧବାରଠାରୁ ଆରମ୍ଭ ହେବ ମାଟ୍ରିକ୍ ପରୀକ୍ଷା। ପ୍ରଶ୍ନପତ୍ର ଭାଇରାଲ ଭଳି ଗଡ଼ବଡ଼ ରୋକିବାକୁ ଏଥର କୋଶ୍ଚିନ୍ ପେପର୍ ଖୋଲାଯିବା ବେଳେ ସାକ୍ଷୀ ରହିବେ ଦୁଇଜଣ ପରୀକ୍ଷାର୍ଥୀ । ତା’ସହ ପରୀକ୍ଷାରେ ସ୍ୱଚ୍ଛତା ଆଣିବା ଲାଗି ଏକ ହଜାର ସେଣ୍ଟରରେ ଲଗାଯାଇଛି ସିସିଟିଭି।।
ଏ ବର୍ଷ ନୂଆ ପାର୍ଟନ ପ୍ରଶ୍ନ ପତ୍ରକୁ ନେଇ ମନରେ ଟିକିଏ ଶଙ୍କା ଥିବା ଛାତ୍ରଛାତ୍ରୀ କହିଛନ୍ତି । ସେପଟେ ବୋର୍ଡ ପାଇଁ ବଡ଼ ଚ୍ୟାଲେଞ୍ଜ୍ ହେଉଛି ପ୍ରଶ୍ନପତ୍ର ଭାଇରାଲ୍ ରୋକିବା। ଗତବର୍ଷ ସମସ୍ତ ଉଦ୍ୟମ ପରେ ବି ଅଧିକାଂଶ ପ୍ରଶ୍ନପତ୍ର ପରୀକ୍ଷା ସରିବା ପୂର୍ବରୁ ମୋବାଇଲରୁ ମୋବାଇଲ୍ ଘୁରି ବୁଲିଥିଲା ।
ଏଥର ଯେପରି ସେମିତି ନହୁଏ ସେଥିପାଇଁ ଅଣ୍ଟା ଭିଡ଼ିଛି ବୋର୍ଡ । ଏଥର ପରୀକ୍ଷା ହଲରେ ହିଁ ପ୍ରଶ୍ନ ପ୍ୟାକେଟ୍ ଖୋଲାଯିବ। ପ୍ରଶ୍ନପତ୍ର ଖୋଲିବା ବେଳେ ଦୁଇ ପରୀକ୍ଷାର୍ଥୀ ସାକ୍ଷୀ ରହିବେ । ସେମାନଙ୍କ OK ରିପୋର୍ଟ ପରେ ବଣ୍ଟାଯିବ ପ୍ରଶ୍ନପତ୍ର । ଏହାବ୍ୟତୀତ ପରୀକ୍ଷା କେନ୍ଦ୍ରକୁ ମୋବାଇଲ୍ ନେବା ଉପରେ ଲଗାଯାଇଛି କଟକଣା । ମୋଟ୍ ୨ହଜାର ୮୮୮ କେନ୍ଦ୍ର ମଧ୍ୟରୁ ଏକ ହଜାର ସମ୍ବେଦନଶୀଳ କେନ୍ଦ୍ରରେ ଲାଗିଛି ସିସିଟିଭି । କପି ରୋକିବା ପାଇଁ ଫ୍ଲାଇଂ ସ୍କ୍ୱାର୍ଡ଼ରେ ପ୍ରଥମ ଥର ପାଇଁ କଲେଜ ଅଧ୍ୟାପକମାନଙ୍କୁ ସାମିଲ କରାଯାଇଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।