ନିର୍ବାଚନର ୩୬ ଘଣ୍ଟା ପୂର୍ବରୁ ନିର୍ବାଚନ ମଣ୍ଡଳୀ ଛାଡିବେ ବାହାର ନେତା

ଭୁବନେଶ୍ୱର: ତ୍ରିସ୍ତରୀୟ ପଞ୍ଚାୟତ ଭୋଟର ୩୬ ଘଣ୍ଟା ପୂର୍ବରୁ କୌଣସି ନିର୍ବାଚନ ମଣ୍ଡଳୀରେ ବାହାର ଅଞ୍ଚଳର ନେତା ରହିପାରିବେ ନାହିଁ। ନିର୍ବାଚନକୁ ସ୍ୱଚ୍ଛ ଓ ନିରପେକ୍ଷ କରିବା ଲାଗି ରାଜ୍ୟ ନିର୍ବାଚନ କମିଶନ ଆଜି ଏହି ନିର୍ଦ୍ଦେଶ ଦେଇଛନ୍ତି।

ପ୍ରଚାର ଶେଷ ହେବା କ୍ଷଣି ବାହାର ଅଞ୍ଚଳର ନେତାମାନଙ୍କୁ ସମ୍ପକ୍ତ ନିର୍ବାଚନ ମଣ୍ଡଳି ଛାଡି ଚାଲି ଯିବାକୁ ପଡିବ। ତେବେ ନିଜ ନିର୍ବାଚନ ମଣ୍ଡଳୀରେ ସ୍ଥାନୀୟ ମନ୍ତ୍ରୀ ଓ ନେତା ରହିପାରିବେ। ସେମାନଙ୍କ ଉପରେ ଏହି କଟକଣା ଲାଗୁ କରାଯିବ ନାହିଁ।

ଏହାସହ ମତଦାନର ୩୬ ଘଣ୍ଟା ପୂର୍ବରୁ କେହି ପ୍ରାର୍ଥୀ କୌଣସି ଉପାୟରେ ପ୍ରଚାର କରିପାରିବେ ନାହିଁ।

ଭୋଟ ପାଇଁ ସରକାରୀ କର୍ମଚାରୀମାନେ ୩ ଦିନ ସ୍ୱତନ୍ତ୍ର ଛୁଟି ନେଇପାରିବେ। ନିର୍ବାଚନ ଦିନ ଏବଂ ନିର୍ବାଚନ ପୂର୍ବ ଓ ପର ଦିନ ଏହି ଛୁଟି ନେଇ ହେବ। ଭୋଟ ଦିନଟିକୁ ସ୍ଥାନୀୟ ଛୁଟି ଘୋଷଣା ଲାଗି ଜିଲ୍ଲାପାଳମାନଙ୍କୁ ପଞ୍ଚାୟତିରାଜ ବିଭାଗ ପକ୍ଷରୁ ନିର୍ଦ୍ଦେଶ ଦିଆଯାଇଛି।