ଜିଏସ୍‌ଟି ଭୟ: ଜୁଏଲରୀ ଓ ଇଲୋକ୍ଟ୍ରୋନିକ ଦୋକାନରେ ଗ୍ରାହକଙ୍କ ଭିଡ଼

ଭୁବନେଶ୍ୱର: ମଧ୍ୟରାତିରୁ ଜିଏସ୍‌ଟି ଲଞ୍ଚ୍ ହେଉଥିବା ବେଳେ ନୂଆ ଟିକସ୍‌ ବ୍ୟବସ୍ଥାକୁ ନେଇ ସମସ୍ତେ ଦ୍ୱନ୍ଦ୍ୱରେ ଅଛନ୍ତି। ବିଶେଷ କରି ବ୍ୟବସାୟୀ ଓ ଗ୍ରାହକ। ଜିଏସ୍‌ଟି ଲାଗୁ ପରେ ବିଭିନ୍ନ କ୍ଷେତ୍ରରେ ଦରଦାମ ବଢିବା ଏକପ୍ରକାର ନିଶ୍ଚିତ। ଏପରି ସ୍ଥିତିରେ ଆଜି ରାଜଧାନୀ ଭୁବନେଶ୍ୱରର ବିଭିନ୍ନ ଜୁଏଲାରୀ ଓ ଇଲେକ୍ଟ୍ରୋନିକ ଶୋ’ରୁମ୍‌ରେ ଗ୍ରାହକଙ୍କ ଭିଡ଼ ଦେଖିବାକୁ ମିଳିଥିଲା। କିଏ ଟିଭି କିଣି ନେଉଥିଲା ତ ଆଉ କିଏ ଫ୍ରିଜ୍, ପୁଣି କିଏ ଓ୍ୱାସିଂମେସିନ୍।

ସୂଚନା ଅନୁଯାୟୀ, ଜିଏସ୍‌ଟି ଲାଗୁ ହେବା ପରେ ଇଲେକ୍ଟ୍ରୋନିକ୍ସ ସାମଗ୍ରୀର ମୂଲ୍ୟ ୪ରୁ ୫ ପ୍ରତିଶତ ମହଙ୍ଗା ହେବ। ତେଣୁ ଏହା ପୂର୍ବରୁ ବିଭିନ୍ନ ଘରୋଇ ଉପକରଣ କିଣିବାକୁ ଗ୍ରାହକ ଦୋକାନରେ ଭିଡ ଲଗାଇଥିଲେ।

ସେହିପରି ସୁନା ଦୋକାନରେ ବି ଗ୍ରାହକଙ୍କୁ ଆକୃଷ୍ଟ କରିବା ପାଇଁ ପ୍ରି-ଜିଏସ୍‌ଟି ଅଫର୍ ଘୋଷଣା କରାଯାଇଛି। ତେବେ ଅଳଙ୍କାର ଉପରେ ଜିଏସ୍‌ଟି କିଭଳି ଲାଗୁ ହେବ ସେନେଇ ସ୍ପଷ୍ଟ ସୂଚନା ମିଳିନଥିବା ବ୍ୟବସାୟୀ କହିଛନ୍ତି। କେତେକ ସପିଂ ମଲ୍ ଆଜି ରାତି ୧୨ଟାରୁ ୨ଟା ପର୍ଯ୍ୟନ୍ତ ଖୋଲା ରଖିବାକୁ ଘୋଷଣା କରିଛନ୍ତି।