ନୂଆଦିଲ୍ଲୀ: ନୂଆଦିଲ୍ଲୀରେ ମାଓ ପ୍ରଭାବିତ ରାଜ୍ୟ ଗୁଡିକର ସମୀକ୍ଷା ବୈଠକରେ ମାଲକାନଗିରି ଜିଲ୍ଲାରେ ଚାଲିଥିବା ଗୁରୁପ୍ରିୟା ସେତୁର ନିର୍ମାଣ କାମ ସମ୍ପୂର୍ଣ୍ଣ କରିବା ପାଇଁ କେନ୍ଦ୍ରକୁ ଅଧିକ ୧୪୨ କୋଟି ଟଙ୍କା ମାଗିଛନ୍ତି ରାଜ୍ୟ ସରକାର। ବୈଠକରେ ମୁଖ୍ୟ ଶାସନ ସଚିବ ଆଦିତ୍ୟ ପ୍ରସାଦ ପାଢୀ ଯୋଗଦେଇ ଏହି ଦାବି କରିଛନ୍ତି। ଏହାସହ ରାଜ୍ୟ ପାଇଁ ଆଉ ୨ଟି କେନ୍ଦ୍ରୀୟ ବାଟାଲିୟନ ଓ ନିରାପତ୍ତା ସମ୍ପର୍କିତ ଖର୍ଚ୍ଚ ବା ଏସ୍ଆରଇ ଯୋଜନାରେ ଆଉ ୩ଟି ଜିଲ୍ଲା ସୁବର୍ଣ୍ଣପୁର, ବୌଦ୍ଧ ଓ ଅନୁଗୋଳକୁ ସାମିଲ କରିବାକୁ ସେ ଦାବି କରିଛନ୍ତି।
ପାଢୀ କହିଛନ୍ତି, “ମାଓବାଦ ପ୍ରଭାବିତ ଅଞ୍ଚଳର ବିଭିନ୍ନ ସମସ୍ୟା ସମ୍ପର୍କରେ ଆଲୋଚନା ହୋଇଥିଲା। ରାଜ୍ୟ ତରଫରୁ ୨ଟି ଅତିରିକ୍ତ କେନ୍ଦ୍ରୀୟ ବାଟାଲିୟନ ଦେବାକୁ ଆମେ ଦାବି କରିଛୁ। ଏସ୍ଆରଇରେ ୩ଟି ଜିଲ୍ଲା କାଟି ଆଉ ୩ଟି ଜିଲ୍ଲାକୁ ସାମିଲ କରିବାକୁ ଆମେ ଅନୁରୋଧ କରିଛୁ। ଗୁରୁପ୍ରିୟା ସେତୁ ବିଷୟରେ ଆଲୋଚନା ହୋଇଥିଲା। କେନ୍ଦ୍ର ସରକାରଙ୍କୁ ଅଧିକ ୧୪୨ କୋଟି ଟଙ୍କା ଦେବାକୁ ଆମେ ଦାବି କରିଛୁ।”
ବୈଠକରେ ଓଡ଼ିଶା ସମେତ ୭ଟି ରାଜ୍ୟର ମାଓବାଦୀ ପ୍ରଭାବିତ ଅଞ୍ଚଳରେ ଚାଲିଥିବା ଉନ୍ନୟନ କାମର ସମୀକ୍ଷା କରାଯାଇଥିଲା। କେନ୍ଦ୍ର ଗୃହ ସଚିବ ରାଜୀବ ମେହର୍ଷିଙ୍କ ଅଧ୍ୟକ୍ଷତାରେ ହୋଇଥିବା ଏହି ବୈଠକରେ କେନ୍ଦ୍ର ଗୃହମନ୍ତ୍ରୀ ରାଜାନାଥ ସିଂଙ୍କ ସହ ୭ଟି ରାଜ୍ୟର ମୁଖ୍ୟ ଶାସନ ସଚିବ ଯୋଗ ଦେଇଥିଲେ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
