ଜମି ଠକେଇ ମାମଲାରେ ଦିଲ୍ଲୀରୁ ପୂର୍ବତନ ସେନା ଅଧିକାରୀ ରାକେଶ ରାଣା ଗିରଫ

ଭୁବନେଶ୍ୱର: ଭୁବନେଶ୍ୱରରେ ଜମି ଠକେଇରେ ସମ୍ପୃକ୍ତ ପୂର୍ବତନ ସେନା ଅଧିକାରୀ କର୍ଣ୍ଣେଲ ରାକେଶ ରାଣାଙ୍କୁ (ଅର୍ଥନୈତିକ ଅପରାଧ ଶାଖା) ଇଓଡବ୍ଲ୍ୟୁ ଦିଲ୍ଲୀରୁ ଗିରଫ କରିଛି। ଚନ୍ଦକା ଅଞ୍ଚଳରେ ଅବସରପ୍ରାପ୍ତ ସେନା କର୍ମଚାରୀଙ୍କୁ ଜମି ଯୋଗାଇବା ପାଇଁ ଏହି ଠକେଇ କରାଯାଇଥିଲା। ରାକେଶ ଜମି ଯୋଗାଇବାକୁ ୩୦ କୋଟି ଟଙ୍କା ଠକି ନେଇଛନ୍ତି। ୧୦୦୦ରୁ ଊର୍ଦ୍ଧ୍ୱ ଅବସରପ୍ରାପ୍ତ ସେନା କର୍ମଚାରୀ ଏହି ଠକେଇର ଶିକାର ହୋଇଛନ୍ତି।

କ୍ରାଇମବ୍ରାଞ୍ଚ ସ୍ପେଶାଲ ଡିଜି ବି.କେ. ଶର୍ମା କହିଛନ୍ତି, ସରକାର ଅବସରପ୍ରାପ୍ତ ସେନା ଅଧିକାରୀଙ୍କୁ ଜମି ଯୋଗାଇ ଦେଇଥାନ୍ତି। ଏଥିପାଇଁ ଚନ୍ଦକା ଅଞ୍ଚଳରେ ଜମି ଚିହ୍ନଟ ହୋଇଥିଲା। ତେବେ ରାକେଶ କିଛି ଲୋକଙ୍କ ସହ ମିଶି ଅବସରପ୍ରାପ୍ତ ସେନା କର୍ମଚାରୀଙ୍କ ନାମରେ ଜାଲ କାଗଜପତ୍ର କରି ଟଙ୍କା ହଡ଼ପ କରିଥିଲେ। ଦିଲ୍ଲୀର ଏକ କୋର୍ଟରେ ତାଙ୍କୁ ହାଜର କରାଯିବା ପରେ ଟ୍ରାନଜିଟ ରିମାଣ୍ଡରେ ଓଡ଼ିଶା ଅଣାଯାଇଛି। ପୂର୍ବରୁ ଏହି ଘଟଣାରେ ଦୁଇଜଣଙ୍କୁ ଗିରଫ କରାଯାଇଥିଲା।