ଭୁବନେଶ୍ୱର: ତିନି ମାସ ପରେ ୪ଟି କେବିକେ ଜିଲ୍ଲାରେ ଆରମ୍ଭ ହୋଇଛି କୋରାପୁଟ କେନ୍ଦ୍ରୀୟ ସମବାୟ ବ୍ୟାଙ୍କର ଭ୍ରାମ୍ୟମାଣ ବ୍ୟାଙ୍କିଙ୍ଗ୍ ସେବା। ତିନି ମାସ ତଳୁ ଏହି ଯୋଜନା କାର୍ଯ୍ୟକାରୀ ହେବାର ଥିଲା। ହେଲେ ଏହା ଆରମ୍ଭ ହୋଇ ପାରି ନ ଥିଲା। ଫଳରେ ଭ୍ରାମ୍ୟମାଣ ସେବା ଯୋଗାଇବାକୁ ପ୍ରସ୍ତୁତ ଥିବା ବସଗୁଡ଼ିକ ପଡ଼ି ରହିଥିଲା। ଏ ନେଇ ନଭେମ୍ୱର ୨୭ରେ ‘ଓଟିଭି’ରେ ଖବର ପ୍ରସାରଣ ପରେ ଏହି ଯୋଜନା କାର୍ଯ୍ୟକାରୀ ହୋଇଛି। ଆଜି ଜୟପୁର ସ୍ଥିତି କୋରାପୁଟ କେନ୍ଦ୍ରୀୟ ସମବାୟ ବ୍ୟାଙ୍କ କେସିସିବି ପରିସରରୁ ୪ଟି ବସ୍ ୪ଟି ଅଞ୍ଚଳକୁ ଯାଇଛି। ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ପକ୍ଷରୁ ମିଳିତ ଭାବେ ଆରମ୍ଭ ହୋଇଥିବା ଏହି ଭ୍ରାମ୍ୟମାଣ ବ୍ୟାଙ୍କ ସେବା ଯୋଜନା କାର୍ଯ୍ୟକାରୀ ହେବା ପରେ ଅବିଭକ୍ତ କୋରାପୁଟ ଜିଲ୍ଲାର ଅନ୍ତର୍ଗତ ରାୟଗଡ଼ାର ପଦ୍ମପୁର, ନବରଙ୍ଗପୁର ଜିଲ୍ଲାର କୋଷାଗୁମୁଡା, ମାଲକାନଗିରି ଜିଲ୍ଲାର କୁଡମୁଲଗୁମ୍ମା ଓ କୋରାପୁଟ ଜିଲ୍ଲାର ଦଶମନ୍ତପୁର ବ୍ଲକ ଅଞ୍ଚଳରେ ଲୋକେ ଘର ପାଖରେ ବ୍ୟାଙ୍କ ସୁବିଧା ପାଇପାରିବେ। ସେପଟେ ଅନ୍ୟ ବ୍ୟାଙ୍କର ପରିଚାଳକମାନେ ଚାହିଁଲେ ବସ୍ ସଂଖ୍ୟା ବୃଦ୍ଧି କରାଯିବ ବୋଲି କେସିସିବି ସଭାପତି କହିଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।