ମାଲକାନଗିରିରେ ୨୦୦ରୁ ଅଧିକ ମାଓ ସମର୍ଥକଙ୍କ ଆତ୍ମସମର୍ପଣ

mao-supportersମାଲକାନଗିରି: ମାଲକାନଗିରି ଜିଲ୍ଲାରେ ଆଜି ପୁଣି ୨୦୦ରୁ ଅଧିକ ମାଓ ସମର୍ଥକ ଆତ୍ମସମର୍ପଣ କରିଛନ୍ତି। ସେମାନେ ମାଲକାନଗିରି ଏସ୍‌ପି ମିତ୍ରଭାନୁ ମହାପାତ୍ରଙ୍କ ନିକଟରେ ଆତ୍ମସମର୍ପଣ କରିଛନ୍ତି। ଆତ୍ମସମର୍ପଣ କରିଥିବା ଏହି ମାଓ ସମର୍ଥକମାନେ ହେଉଛନ୍ତି ମାଥିଲି ଥାନା ଅନ୍ତର୍ଗତ ୪ଟି ଗାଁର।

ଏହା ପୂର୍ବରୂ ମାର୍ଚ୍ଚ ୩୧ ତାରିଖ ଦିନ ମାଓ କାର୍ଯ୍ୟକଳାପକୁ  ବିରୋଧ କରି ୨୫ ଜଣ ମହିଳାଙ୍କ ସମେତ ୭୩ ଜଣ ମାଓ ସମର୍ଥକ ଆତ୍ମସମର୍ପଣ କରିଥିଲେ। ଏମାନେ ମାଥିଲି ଥାନା  ଅନ୍ତର୍ଗତ ଦୁଲଦୁଲି ଓ ଗୁରୁପଦର ଗାଁର ବାସିନ୍ଦା ଥିଲେ।

ମାର୍ଚ୍ଚ ୧୪ ତାରିଖରେ ଜିଲ୍ଲାର ମାଥିଲି ଥାନାରେ ଶତାଧିକ ମାଓ ସମର୍ଥକ ଆତ୍ମସମର୍ପଣ କରିଥିଲେ। ଏମାନେ ସମସ୍ତେ ବାରା ଗାଁର ବାସିନ୍ଦା ଥିଲେ।

ମାର୍ଚ୍ଚ ୧୩ ତାରିଖରେ ପୋଟେରୁ ଫାଣ୍ଡିରେ ମାଲକାନଗିରି ଏସ୍‌ଡିପିଓଙ୍କ ନିକଟରେ ୫୭ ଜଣ ମାଓ ସମର୍ଥକ ଆତ୍ମସମର୍ପଣ କରିଥିଲେ। ସେମାନଙ୍କ ମଧ୍ୟରେ ୨୫ ଜଣ ମହିଳା ଥିଲେ। ସେମାନେ ମାଓବାଦୀଙ୍କ କାଲିମେଳା ଦଲମ୍ ପାଇଁ କାମ କରୁଥିଲେ ବୋଲି ପୋଲିସ୍ ପକ୍ଷରୁ କୁହାଯାଇଥିଲା।

ମାର୍ଚ୍ଚ ୧୨ ତାରିଖରେ ମାଥିଲି ଥାନା ଅନ୍ତର୍ଗତ ଖଟୁଆପଦର ଗାଁର ୧୯ ଜଣ ମାଓ ସମର୍ଥକ ମାଲକାନଗିରି ଏସ୍‌ଡିପିଓଙ୍କ ନିକଟରେ ଆତ୍ମସମର୍ପଣ କରିଥିଲେ। ସେମାନଙ୍କ ମଧ୍ୟରେ ୫ ଜଣ ମିଲିସିଆ, ୩ ଜଣ ଗ୍ରାମ୍ୟ କମିଟି ସଦସ୍ୟ ଓ ୨ ଜଣ ଜନନାଟ୍ୟ ମଣ୍ଡଳୀ ସଦସ୍ୟ ଥିଲେ। ସେମାନେ ସମସ୍ତେ ମାଓବାଦୀଙ୍କ ଦରଭା ଡିଭିଜନ୍‌ର ସଦସ୍ୟ ଥିଲେ। ଏମାନଙ୍କ ନାଁରେ ବିଭିନ୍ନ ଥାନାରେ ମାମଲା ଥିଲା।

ମାର୍ଚ୍ଚ ୧୧ ତାରିଖରେ ୧୯ ଜଣ ମାଓ ସମର୍ଥକ ମାଲକାନଗରି ଏସ୍‌ପି ମିତ୍ରଭାନୁ ମହାପାତ୍ରଙ୍କ ନିକଟରେ ଆତ୍ମସମର୍ପଣ କରିଥିଲେ। ସେହିଦିନ ଛତିଶଗଡ଼ର ବସ୍ତର ଏସ୍‌ପିଙ୍କ ନିକଟରେ ୫୬ ଜଣ ମାଓ ସମର୍ଥକ ଆତ୍ମସମର୍ପଣ କରିଥିଲେ। ସେମାନଙ୍କ ମଧ୍ୟରେ ୧୭ ଜଣ ମାଲକାନଗିରିର ଥିଲେ।

ମାର୍ଚ୍ଚ ୭ ତାରିଖରେ ମାଥିଲି ଥାନା ଅନ୍ତର୍ଗତ କରିମିଟି ଗାଁର ୪୦ ଜଣ ମାଓ ସମର୍ଥକ ମାଲକାନଗିରି ଏସ୍‌ପିଙ୍କ ନିକଟରେ ଆତ୍ମସମର୍ପଣ କରିଥିଲେ।