ଭୁବନେଶ୍ୱର(ଓଡ଼ିଶା ରିପୋର୍ଟର): କେନ୍ଦ୍ର ସରକାର ଆଜି ଅନଲକ୍ -୪ ଗାଇଡଲାଇନ୍ ଜାରି କରି ରାଜ୍ୟରେ ଲକଡାଉନ୍ କରିବା ଉପରେ ଅଙ୍କୁଶ ଲଗାଇଥିବାବେଳେ ଓଡ଼ିଶା ସରକାର ଜେଇଇ-ନିଟ୍ ପରୀକ୍ଷା ପାଇଁ ରାଜ୍ୟବ୍ୟାପୀ ଲକଡାଉନ୍ ଓ ଶଟଡାଉନ୍ ଉପରେ କଟକଣା ଜାରି କରିଛନ୍ତି।
ରାଜ୍ୟ ସ୍ୱତନ୍ତ୍ର ରିଲିଫ କମିଶନର ପ୍ରଦୀପ କୁମାର ଜେନା ଆଜି ଜାରି କରିଥିବା ନିର୍ଦ୍ଦେଶାନାମା ଅନୁସାରେ ଅଗଷ୍ଟ ୩୦ରୁ ସେପ୍ଟେମ୍ବର ୭ ତାରିଖ ଓ ସେପ୍ଟେମ୍ବର ୧୨ରୁ ୧୪ତାରିଖ ପର୍ଯ୍ୟନ୍ତ ସମଗ୍ର ରାଜ୍ୟରେ ଲକଡାଉନ୍ କିମ୍ବା ଶଟଡାଉନ୍ ଲାଗୁ ହେବ ନାର୍ହି। ଜେଇଇ-ନିଟ୍ ପରୀକ୍ଷାର୍ଥୀ ଓ ସେମାନଙ୍କ ଅଭିଭାବକଙ୍କ ସମେତ ପରୀକ୍ଷା କର୍ମୀଚାରୀମାନଙ୍କ ଯାତାୟତ ସୁବିଧା ତଥା ପରୀକ୍ଷା ପରିଚାଳନାକୁ ସହଜ କରିବା ନିମନ୍ତେ ଏପରି ନିଷ୍ପତ୍ତି ନିଆଯାଇଛି।
ତେବେ କୋଭିଡ-୧୯ ପ୍ରୋଟୋକଲ ଅନୁସାରେ ସାମାଜିକ ଦୂରତ୍ୱ, ମାସ୍କ ପିନ୍ଧିବା, ସର୍ବସାଧାରଣ ସ୍ଥାନରେ ଛେପ ନପକାଇବା ଭଳି କଟକଣାକୁ କଡ଼ାକଡ଼ି ଭାବେ ପାଳନ କରାଯିବ ବୋଲି ଶ୍ରୀ ଜେନା ସ୍ପଷ୍ଟ କରିଛନ୍ତି।
ସୂଚନାଯୋଗ୍ୟ, ରାଜ୍ୟ ସରକାର ୭ଟି ସହର ଯଥା- ଅନୁଗୋଳ, ବାଲେଶ୍ୱର, ବ୍ରହ୍ମପୁର, କଟକ, ଭୁବନେଶ୍ୱର, ଢେଙ୍କାନାଳ, ରାଉରକେଲା ଓ ସମ୍ବଲପୁରରେ ଶଟଡାଉନ ଏବଂ ଲକଡାଉନ ନିୟମ କୋହଳ କରିବାକୁ ନିର୍ଦ୍ଦେଶନାମା ଜାରି କରିଥିଲେ।
ଏହି ସବୁ ସହରରେ ଜେଇଇ ଓ ନିଟ୍ର ପରୀକ୍ଷା କେନ୍ଦ୍ର ରହିଛି। ରାଜ୍ୟ ସରକାରଙ୍କର ସଂଶୋଧିତ ନିର୍ଦ୍ଦେଶନାମା ଯୋଗୁ ଆସନ୍ତାକାଲି ରାଜ୍ୟରେ ଶଟଡାଉନ ଜନିତ ଦୋକାନ ବଜାର ବନ୍ଦ ରହିବ ନାହିଁ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।