ରାଜଧାନୀରେ କାଳବୈଶାଖୀର ତାଣ୍ଡବ

ଭୁବନେଶ୍ୱର: ଦିନ ତମାମ ଗୁଳିଗୁଳି ପରେ ରାଜଧାନୀବାସୀ ରାତି ପ୍ରାୟ ୧୦ଟା ବେଳେ କାଳବୈଶାଖୀର ତାଣ୍ଡବ ଦେଖିଛନ୍ତି। ରାତି ୧୦ଟା ବେଳକୁ ହଠାତ୍‌ ଆକାଶରେ ମେଘ ଘୋଟାଇ ଆସିବା ସହ ଜୋରରେ ପବନ ବୋହିଥିଲା। ସୂଚନା ଅନୁଯାୟୀ, ପବନର ଘଣ୍ଟା ପ୍ରତି ବେଗ ୬୦ରୁ ୭୦ କିମି ରହିଥିଲା। ବେଳେ ବେଳେ ଏହା ୯୦ରୁ ୧୦୦ କିମି ମଧ୍ୟ ଛୁଇଁଥିବା ଜଣାପଡ଼ିଛି।

ଏଥିଯୋଗୁ ବ୍ୟାପକ ସ୍ଥାନରେ କ୍ଷୟକ୍ଷତି ହୋଇଥିବା ଜଣାପଡ଼ିଛି। କିନ୍ତୁ ଏ ସମ୍ପର୍କରେ ରିପୋର୍ଟ ଲେଖା ହେବା ଯାଏ ବିସ୍ତୃତ ସୂଚନା ମିଳିନାହିଁ। କାଳବୈଶାଖୀର ତାଣ୍ଡବ ଯୋଗୁ ରାସ୍ତା କଡ଼ରେ ଥିବା କିଛି ଗଛ ଭାଙ୍ଗି ଯାଇଛି। ସେହିପରି ଏକାଧିକ ବସ୍ତିରେ ରହୁଥିବା ଘର କ୍ଷତିଗ୍ରସ୍ତ ହୋଇଥିବାର ସୂଚନା ରହିଛି।