ନେତା ଶୁଣୁ ନାହାନ୍ତି ଗୁହାରୀ, ଗ୍ରାମବାସୀଙ୍କ ଭୋଟ ବର୍ଜନ ଚେତାବନୀ

ଜଗତସିଂହପୁର (ଓଡ଼ିଶା ରିପୋର୍ଟର): ନିର୍ବାଚନ ଆସିଲେ ନେତାଙ୍କ ଦେଖା ମିଳେ। ମାଳ ମାଳ ପ୍ରତିଶ୍ରୁତି ସହ ସବୁ ସମସ୍ୟା ସମାଧାନର ପ୍ରତିଶ୍ରୁତି ବି ଦିଅନ୍ତି । ହେଲେ ନିର୍ବାଚନ ସରିବା ପରେ ନେତା ତାଙ୍କ ବାଟରେ, ପ୍ରତିଶ୍ରୁତି କଥା ତାଙ୍କର ମନେ ମଧ୍ୟ ପଡ଼େ ନାହିଁ। ଏପରି ବାରମ୍ବାର ପ୍ରତାରଣାର ଶିକାର ହେବା ପରେ କ୍ଷୁବ୍ଧ ଅଛନ୍ତି ତିର୍ତ୍ତୋଲ ବ୍ଲକର ଗୋପାଳପୁର, ବିରିତୋଳ, କଟରା ପଞ୍ଚାୟତବାସୀ। ଏଥିପାଇଁ ୩ଟି ଗାଁର ଲୋକେ ଭୋଟ ବର୍ଜନ କରିବାକୁ ନିଷ୍ପତ୍ତି ନେଇଛନ୍ତି।

ଗାଁଲୋକଙ୍କ ଅଭିଯୋଗ ଅନୁସାରେ,ତିର୍ତ୍ତୋଲ ବ୍ଲକର ଗୋପାଳପୁର, ବିରିତୋଳ, କଟରା ଗାଁକୁ ଏକ ବନ୍ଧ ରାସ୍ତା ସଂଯୋଗ କରୁଛି। ୩୦ ବର୍ଷ ହେଲାଣି ଗାଁର ରାସ୍ତା ଖାଲଖମା ହୋଇ ପଡ଼ିରହିଛି। ଫଳରେ ଏହି ରାସ୍ତା ଦେଇ ଯାତାୟତ କରୁଥିବା ଲୋକେ ଅସୁବିଧାର ସମ୍ମୁଖୀନ ହେଉଛନ୍ତି। ବଡ଼ ବଡ଼ ଗାତ ହୋଇଥିବା ଯୋଗୁ ଏ ରାସ୍ତାରେ ପ୍ରାୟ ପ୍ରତ୍ୟେକ ଦିନ ଦୁର୍ଘଟଣା ଘଟୁଛି। ବିଶେଷ କରି ସ୍କୁଲ୍ ପିଲାମାନେ ଭାରି ହଇରାଣ ହେଉଛନ୍ତି।
। ଗାଁର ରାସ୍ତା ମରାମତି ପାଇଁ ଲୋକେ ବିଡିଓ, ଜିଲ୍ଲାପାଳ ଓ ଗ୍ରାମ୍ୟ ଉନ୍ନୟନ ବିଭାଗକୁ ଲିଖିତ ଅଭିଯୋଗ କରିଥିଲେ। ହେଲେ କୌଣସି ସୁଫଳ ମିଳି ନଥିଲା। ରାସ୍ତା ମରାମତି ହେଉନଥିବାରୁ ଏଥର ଗାଁ ଲୋକେ ଭୋଟ ବର୍ଜନ କରିବାକୁ ନିଷ୍ପତ୍ତି ନେଇଛନ୍ତି।

ଏନେଇ ବିଭାଗୀୟ ଅଧିକାରୀଙ୍କ ମତାମତ ମିଳିପାରି  ନ ଥିବା ବେଳେ ଜଣେ ଗ୍ରାମବାସୀ କହିଛନ୍ତି, କେନାଲ ବନ୍ଧର ଅବସ୍ଥା ଏମିତି ଖରାପ ଯେ, ଖାଲି ପାଦରେ ବି ଚାଲି ଯାଇ ହେଉନି। ରୋଗୀକୁ ନେବା ଦୂରର କଥା। ବହୁ ଅଭିଯୋଗ ପରେ ବି କେହି ଶୁଣୁ ନାହାନ୍ତି। ତେଣୁ ପ୍ରତିବାଦ ଜଣାଇବାକୁ ଆମେ ଭୋଟ ବର୍ଜନ ନିଷ୍ପତ୍ତି ନେଇଛୁ।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।