ରାସନକାର୍ଡ଼ ଅନିୟମିତତା! ବିଡ଼ିଓଙ୍କ କାର୍ଯ୍ୟାଳୟରେ ଭଙ୍ଗାରୁଜା

ଜଳେଶ୍ୱର (ଓଡ଼ିଶା ରିପୋର୍ଟର): ରାସନ୍‌କାର୍ଡ଼ ବଣ୍ଟନରେ ଯୋଗ୍ୟ ହିତାଧିକାରୀଙ୍କୁ ଉପେକ୍ଷା କରାଯାଇ ଅଯୋଗ୍ୟଙ୍କୁ ଦିଆଯାଇଥିବା ଅଭିଯୋଗ ହୋଇଛି। ଏହାର ପ୍ରତିବାଦରେ ଆଜି ଯୋଗ୍ୟ ହିତାଧିକାରୀମାନେ ବ୍ଲକ ଅଫିସ୍‌ରେ ଭଙ୍ଗାରୁଜା କରିଛନ୍ତି। ଏପରି ଅଭାବନୀୟ ଘଟଣା ବାଲେଶ୍ୱର ଜିଲ୍ଲା ବାଲିଆପାଳ ବ୍ଲକ ଅଫିସ୍‌ରେ ଘଟିଛି।

ରାସନ୍‌କାର୍ଡ଼ ହିତାଧିକାରୀ ଚୟନରେ ଅନିୟମିତତା ଅଭିଯୋଗ ନେଇ ନାମକୁଣ୍ଡା ପଞ୍ଚାୟତବାସୀ ଆଜି ବିଡିଓଙ୍କୁ ଜଣାଇବାକୁ ଆସିଥିଲେ। ବିଡ଼ିଓ ନଥିବାରୁ ମୁଖ୍ୟ କିରାଣୀ ଦାବିପତ୍ର ଗ୍ରହଣ କରିଥିଲେ। ପରେ ଗାଁ ଲୋକେ ବ୍ଲକ ଅଫିସ୍‌ରେ ପଶି ଭଙ୍ଗାରୁଜା କରିଥିଲେ। ଏହାକୁ ନେଇ ଅଭିଯୋଗ ହେବା ପରେ ପୋଲିସ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି।

ବ୍ଲକ ଅଫିସ୍‌ କିରାଣୀ ମଧୁସୂଦନ ମହାପାତ୍ର କହିଛନ୍ତି-“ରାସନକାର୍ଡ଼ ଅନିମିତତା ଅଭିଯୋଗ ଆଣି  ୫୦ରୁ ୬୦ ମହିଳା ଆଜି ବିଡ଼ିଓଙ୍କୁ ଦେଖା କରିବାକୁ ଆସିଥିଲେ। ବିଡିଓ ନଥିବାରୁ ତାଙ୍କ କାର୍ଯ୍ୟାଳୟରେ ଭଙ୍ଗାରୁଜା କରିଛନ୍ତି।”