ସମ୍ୱଲପୁର: ଶୀତଳଷଷ୍ଠୀ ଯାତ୍ରା ପାଇଁ ସମ୍ୱଲପୁର ସହର ଉତ୍ସବ ମୁଖର ହୋଇପଡ଼ିଛି। ଆଜି ହର-ପାର୍ବତୀଙ୍କ ବାହାଘର। ସଂପୂର୍ଣ୍ଣ ଲୋକାଚାର ମତରେ ମହାଦେବଙ୍କ ହାତ ଧରିବେ ମା’ ପାର୍ବତୀ। ଏଥିପାଇଁ ସମସ୍ତ ପ୍ରସ୍ତୁତି ଶେଷ ହୋଇଛି। ବାହାଘର ପୂର୍ବରୁ ଗତ ରାତିରେ ପାରମ୍ପରିକ ରୀତିନୀତିରେ ହନୁମାନ ନିଉତା ବା ଗୁଆଗୁଣ୍ଡା ସଂପନ୍ନ ହୋଇଛି। ହର-ପାର୍ବତୀଙ୍କ ବିବାହ ଉତ୍ସବରେ ଯୋଗ ଦେବା ଲାଗି ବିଭିନ୍ନ ଦେବଦେବୀଙ୍କୁ ଗୁଆ ଦେଇ ହନୁମାନ ମହାପ୍ରଭୁ ନିମନ୍ତ୍ରଣ କରିଛନ୍ତି। ଏଥିପାଇଁ ସବୁ ଶିବାଳୟ ଗୁଡ଼ିକୁ ରଙ୍ଗୀନ ଆଲୋକମାଳରେ ସଜ୍ଜା ଯାଇଥିଲା। ସହରର ଝାଡୁଆପଡ଼ା, ମୋଦିପଡ଼ା, ବଡ଼ବଜାର, ଠାକୁରପଡ଼ା, ବାଲିବନ୍ଧା, ମାନେଶ୍ୱର ଓ ବୁଢାରଜା ସମେତ ବିଭିନ୍ନ ଶିବାଳୟରୁ ନିଉତାରେ ବାହାରିଥିଲେ ହନୁମାନ। ପାରମ୍ପରିକ ବାଦ୍ୟ ସାଙ୍ଗକୁ ଘଣ୍ଟଘଣ୍ଟାରେ ସାରା ସହରରେ ସୃଷ୍ଟି ହୋଇଥିଲା ଆଧ୍ୟାତ୍ମିକ ପରିବେଶ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
