ସୁନ୍ଦରଗଡ: ରେଞ୍ଜଡା ସାଇଡିଂରେ ଶ୍ରମିକ ଗୋଷ୍ଠୀ ସଂଘର୍ଷ ଘଟଣା, ଟ୍ରେନରେ ଲୋଡିଂ ବନ୍ଦ

ସୁନ୍ଦରଗଡ: କେ.ବଲାଙ୍ଗ ଥାନା ରେଞ୍ଜଡା ସାଇଡିଂକୁ ନେଇ ଦୁଇ ଶ୍ରମିକ ଗୋଷ୍ଠୀ ମଧ୍ୟରେ ଗଣ୍ଡଗୋଳ ଘଟିବା ସହ ବିବାଦୀୟ ପରିସ୍ଥିତି ଲାଗି ରହିଛି। ବିଏମ୍ଏସ୍ ଓ ସିପିଆଇଏମ୍ ଶ୍ରମିକ ଗୋଷ୍ଠୀଙ୍କ ମଧ୍ୟରେ ଗଣ୍ଡଗୋଳ ଘଟି ଏକାଧିକ ଆହତ ହୋଇ ବିଭିନ୍ନ ଚିକିତ୍ସାଳୟରେ ଚିକିତ୍ସିତ ହେଉଛନ୍ତି। ଘଟଣାସ୍ଥଳରେ ଉତ୍ତେଜନା ପରିସ୍ଥିତି ଲାଗି ରହିଛି। ଏ ନେଇ ପୋଲିସ ପ୍ରଶାସନର ହସ୍ତକ୍ଷେପ ପରେ ବି ବିବାଦର ସମାଧାନ ହୋଇପାରିନି। ଏପଟେ ଟ୍ରେନ ଠିଆ ହୋଇ ରହିଥିଲେ ମଧ୍ୟ ଲୋଡିଂ ହୋଇପାରୁନି। ଶନିବାର ରାତିରେ ବିଏମସ ଓ ସିପିଆଇଏମ ମୁହାଁମୁହିଁ ହୋଇଥିଲେ। କିଛିଦିନ ତଳେ ରେଞ୍ଜଡା ଅଞ୍ଚଳରେ ମାଟିତଳେ ଲୁହାପଥର ଲୁଚାଇ ଚୋରାଚାଲାଣ କରାଯାଉଥିବା ଅଭିଯୋଗ ହୋଇଥିଲା। ଏ ନେଇ ତଦନ୍ତ ମଧ୍ୟ ହୋଇଥିଲା। ପରେ ଘଟଣାକୁ ନେଇ ଦୁଇ ଶ୍ରମିକ ଗୋଷ୍ଠୀ ମୁହାଁମୁହିଁ ହୋଇଛନ୍ତି।