କାମାକ୍ଷାନଗର (ଓଡ଼ିଶା ରିପୋର୍ଟର): ପାଣି ପାଇଁ ରାସ୍ତାରୋକ। ଗରା ଓ ବାଲ୍ତି ଧରି ଲୋକେ ରାସ୍ତାରୋକ ଉପରେ ବସିଲେ। ପାନୀୟ ଜଳ ଯୋଗାଣ ହେଲା ପରେ ରାସ୍ତାରୁ ଉଠିବୁ। ଏପରି ସ୍ଥିତି ଦେଖିବାକୁ ମିଳିଛି ଢେଙ୍କାନାଳ-କାମାକ୍ଷାନଗର ରାସ୍ତାରେ।
ପାନୀୟ ଜଳ ସମସ୍ୟା ନେଇ ଗାଁ ଲୋକେ ଗରା ଓ ବାଲ୍ତି ଧରି ଗତ ୧୮ ତାରିଖରେ କାମାକ୍ଷାନଗର ଉପଜିଲ୍ଲାପାଳଙ୍କଠାରେ ଅଭିଯୋଗ କରିଥିଲେ। ଲୋକଙ୍କ ଅଭିଯୋଗକୁ ଶୁଣି ସମାଧାନ କରାଯିବ ବୋଲି ଉପଜିଲ୍ଲାପାଳ ପ୍ରତିଶ୍ରୁତି ଦେଇଥିଲେ। ଇତି ମଧ୍ୟରେ ୪ ଦିନ ବିତିଗଲାଣି। ହେଲେ ଗାଁରେ ପାଣି ପହଞ୍ଚି ନାହିଁ। ଲୋକେ ପାଣି ମୁନ୍ଦାଏ ପାଇଁ ନାହିଁନଥିବା ଅସୁବିଧାରେ ପଡ଼ୁଛନ୍ତି। ଏହାର ପ୍ରତିବାଦରେ ଗାଁର ଶତାଧିକ ମହିଳା ଓ ପୁରୁଷ ଢେଙ୍କାନାଳ-କାମାକ୍ଷାନଗର ରାସ୍ତାର ବିଜାଡ଼ିହିଠାରେ ରାସ୍ତା ରୋକ କରିଥିଲେ। ଫଳରେ ଗାଡ଼ି ଚଳାଚଳ ଏକପ୍ରକାର ଠପ୍ ହୋଇଯାଇଥିଲା। ଖବର ପାଇ କାମାକ୍ଷାନଗର ବିଡିଓ ଓ ତହସିଲଦାର ଘଟଣାସ୍ଥଳରେ ପହଞ୍ଚି ଓପିଟିସିଏଲ୍ ତରଫରୁ ପାଣି ଯୋଗାଣ ହେବ ବୋଲି ପ୍ରତିଶ୍ରୁତି ଦେବା ପରେ ରାସ୍ତାରୋକ ପ୍ରତ୍ୟାହୃତ ହୋଇଥିଲା।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।