ଫିକା ପଡ଼ିଲା ଗୁରୁ ଦିବସ: କାନ୍ଥ ପଡ଼ି ଛାତ୍ରର ପ୍ରାଣ ଗଲା

ଗଞ୍ଜାମ(ଓଡ଼ିଶା ରିପୋର୍ଟର): ଆଜି ଗୁରୁଦିବସ। ଗୁରୁଙ୍କୁ ପୂଜା କରିବାକୁ ଆସିଥିବା ବେଳେ ସ୍କୁଲ କାନ୍ଥ ପଡ଼ି ଜଣେ ଛାତ୍ରର ମୃତ୍ୟୁ ହୋଇଯାଇଛି। ମୃତ ଛାତ୍ର ଜଣକ ଷଷ୍ଠ ଶ୍ରେଣୀରେ ପାଠ ପଢ଼ନ୍ତି। ଏପରି ଅଭାବନୀୟ ଘଟଣା ଗଞ୍ଜାମ ଜିଲ୍ଲା ଖଲିକୋଟ ବାଣିଆ ୟୁଜି ଏମ୍‌ଇ ସ୍କୁଲରେ ଘଟିଛି। ଏହି ଘଟଣା ପରେ ସ୍କୁଲରେ ଶୋକର ଛାୟା ଖେଳିଯାଇଛି।

ଆଜି ଗୁରୁ ଦିବସ ଥିବାରୁ ସମସ୍ତ ଛାତ୍ରଛାତ୍ରୀ ଗୁରୁଙ୍କୁ ପୂଜା କରିବା ପାଇଁ ଗାଧୋଇ ହାତରେ ଫୁଲ ଧରି ସ୍କୁଲ ଆସିଥିଲେ। ଗୁରୁଙ୍କୁ ପୂଜା କରିବା ପାଇଁ ସମସ୍ତେ ଛାତ୍ରଛାତ୍ରୀ ଏକତ୍ର ହୋଇଥିଲେ। ଏହି ସମୟରେ ନିର୍ମାଣାଧୀନ ସ୍କୁଲ କାନ୍ଥକୁ ଏକ ଟ୍ରାକ୍ଟର ଧକ୍କା ଦେଇଥିଲା। ଫଳରେ କାନ୍ଥ ଭାଙ୍ଗି ଛାତ୍ରଙ୍କ ଉପରେ ପଡ଼ିଥିଲା। ଉପସ୍ଥିତ ଶିକ୍ଷକମାନେ ଗୁରୁତର ଆହତ ଛାତ୍ରଙ୍କୁ ଉଦ୍ଧାର କରି ଖଲିକୋଟ ଡାକ୍ତରଖାନାରେ ଭର୍ତ୍ତି କରିଥିଲେ। ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଛି।