ଆହତ ସାମି ଆଇପିଏଲରୁ ବାହାରିଲେ

ନୂଆଦିଲ୍ଲୀ: ଆଣ୍ଠୁରେ ଆଘାତ ଲାଗିବା ଯୋଗୁ ଚଳିତ ଆଇପିଏଲରୁ ବାହାରି ଯାଇଛନ୍ତି ଭାରତର ଷ୍ଟାର୍ ପେସ୍ ବୋଲର୍ ମହମ୍ମଦ ସାମି। ନିକଟରେ ବିଶ୍ୱକପ୍ କ୍ରିକେଟରେ ଚମକ୍ରାର ବୋଲିଂ କରିଥିବା ସାମି ଆଇପିଏଲରେ ‘ଦିଲ୍ଲୀ ଡେୟାର ଡେଭିଲ୍ସ’ ପକ୍ଷରୁ ଖେଳୁଥିଲେ । ସାମି ବାହାରି ଯିବା ପରେ ଦିଲ୍ଲୀକୁ ବଡ଼ ଝଟକା ଲାଗିଛି। ଅବଶ୍ୟ ଆହତ ଯୋଗୁ ସାମି ଏପର୍ଯ୍ୟନ୍ତ ଆଇପିଏଲରେ ଗୋଟିଏ ବି ମ୍ୟାଚ୍ ଖେଳି ନ ଥିଲେ। ଦିଲ୍ଲୀ ଡେୟାର ଡେଭିଲ୍ସ ଏପର୍ଯ୍ୟନ୍ତ ତିନୋଟି ମ୍ୟାଚ ଖେଳିଛି ଏବଂ ଗୋଟିକରେ ବିଜୟୀ ହୋଇଛି।

ସାମିଙ୍କୁ ଭଲ ହେବାକୁ ଆହୁରି ଦୁଇ ମାସ ଲାଗିବ। ବିସିସିଆଇର ଜଣେ ଅଧିକାରୀ କହିଛନ୍ତି, ‘ସାମି ଆଇପିଏଲରୁ ବାହାରି ଯାଇଛନ୍ତି। ତାଙ୍କ ଆଣ୍ଠୁରେ ଅପରେସନ୍ ଦରକାର ହୋଇପାରେ । ସେ ଆଇପିଏଲରେ ସାମିଲ ହେବାର ନଥିଲା। ତାଙ୍କୁ ଭଲ ହେବାକୁ ଦୁଇ ମାସ ଲାଗିଯିବ।

ବିଶ୍ୱକପରେ ସେ ଭାରତୀୟ ବୋଲରଙ୍କ ମଧ୍ୟରେ ସବୁଠୁ ଅଧିକ ୧୮ଟି ୱିକେଟ୍ ନେଇଥିଲେ। ତେବେ ତାଙ୍କୁ ୟୁଏଇ ବିପକ୍ଷ ମ୍ୟାଚରେ ବସାଇ ଦିଆଯାଇଥିଲା। ସେବଠାରୁ ତାଙ୍କର ଆଣ୍ଠୁରେ ଆଘାତ ଲାଗିଥାଇପାରେ ବୋଲି କୁହାଯାଉଛି। ତାଙ୍କ ବଦଳରେ ଭୁବନେଶ୍ୱର କୁମାରଙ୍କୁ ଖେଳା ଯାଇଥିଲା।