ମାଡ୍ରିଡ୍ ଓପନ୍: ଡିଫେଣ୍ଡିଂ ଚାମ୍ପିଅନ୍ ଜ୍ୱେରେଭଙ୍କୁ ବିଦା କଲେ ସିଟସିପାସ୍

ମାଡ୍ରିଡ୍: ଡିଫେଣ୍ଡିଂ ଚାମ୍ପିଅନ୍ ଆଲେକଜାଣ୍ଡାର ଜ୍ୱେରେଭଙ୍କୁ ହରାଇ ଗ୍ରୀକ୍ ଟେନିସ୍ ଖେଳାଳି ଷ୍ଟିଫାନସ୍ ସିଟସିପାସ୍ ଚଳିତ ମାଡ୍ରିଡ୍ ଓପନ୍ ସେମିଫାଇନାଲରେ ପ୍ରବେଶ କରିଛନ୍ତି। କ୍ୱାର୍ଟରଫାଇନାଲରେ ସିଟସିପାସ୍ ୭-୫, ୩-୬, ୬-୨ ସେଟରେ ଜ୍ୱେରେଜଙ୍କୁ ପରାସ୍ତ କରିଥିଲେ।

ସେମିଫାଇନାଲରେ ସିଟସିପାସ୍ ପାଞ୍ଚଥରର ବିଜେତା ରାଫେଲ୍ ନାଡାଲଙ୍କୁ ଭେଟିବେ। ସ୍ପେନୀୟ ତାରକା ନାଡାଲ୍ କ୍ୱାର୍ଟରରେ ସ୍ୱିଜରଲ୍ୟାଣ୍ଡର ଷ୍ଟାନିସ୍ଲାସ୍ ୱାରିଙ୍କାଙ୍କୁ ୬-୧, ୬-୨ ସେଟରେ ପରାସ୍ତ କରିଛନ୍ତି। ଗତ ୧୫ ବର୍ଷ ମଧ୍ୟରେ ନାଡାଲଙ୍କର ଏହା ୧୪ତମ କ୍ୱାର୍ଟର୍ ମୁକାବିଲା ଥିଲା। ଅନ୍ୟଏକ ସେମିଫାଇନାଲ୍ ମୁକାବିଲା ବିଶ୍ୱର ଏକ ନମ୍ବର ଖେଳାଳି ନୋଭାକ୍ ଜୋକୋଭିକ୍ ଓ ଡୋମିନିକ୍ ଥିଏମଙ୍କ ମଧ୍ୟରେ ଅନୁଷ୍ଠିତ ହେବ।

ଥିଏମ୍ କ୍ୱାର୍ଟରରେ ଜବରଦସ୍ତ ପ୍ରଦର୍ଶନ କରି ସ୍ୱିଜରଲ୍ୟାଣ୍ଡର ରୋଜର ଫେଡେରରଙ୍କଚ ୩-୬, ୭-୬ (୧୩/୧୧), ୬-୪ ସେଟରେ ହରାଇଛନ୍ତି। ଅନ୍ୟପକ୍ଷରେ କ୍ୱାର୍ଟରରେ ଜୋକୋଭିକଙ୍କ ପ୍ରତିଦ୍ୱନ୍ଦ୍ୱୀ କ୍ରୋଏସିଆର ମାରିନ୍ ସିଲିକ୍ ଆହତ କାରଣରୁ ଅଧାରୁ ଓହରିଯାଇଥିଲେ, ଯେଉଁ କାରଣରୁ ସର୍ବୀୟ ଖେଳାଳି ସହଜରେ ସେମିଫାଇନାଲରେ ସ୍ଥାନ ହାସଲ କରିଥିଲେ।