ଆହତ ଭୁବନେଶ୍ୱର କୁମାର ଅଷ୍ଟ୍ରେଲିଆ ବିପକ୍ଷ ଟି-ଟ୍ୱେଣ୍ଟି ସିରିଜରୁ ବାଦ୍

ସିଡନୀ: ଭାରତକୁ ଶନିବାର ଲାଗିଛି ଡବଲ୍ ଝଟକା। ଜାନୁଆରୀ ୨୬ ତାରିଖରୁ ଅଷ୍ଟ୍ରେଲିଆ ବିପକ୍ଷରେ ଆରମ୍ଭ ହେବାକୁ ଥିବା ତିନୋଟି ମ୍ୟାଚ୍ ବିଶିଷ୍ଟ ଟି-ଟ୍ୱେଣ୍ଟି ସିରିଜରୁ ପେସର୍ ଭୁବନେଶ୍ୱର କୁମାରଙ୍କୁ ବାଦ ଦିଆଯାଇଛି। ସେହିଭଳି ଆଜିଙ୍କ୍ୟ ରାହାଣେଙ୍କ ଖେଳିବା ନେଇ ମଧ୍ୟ ଆଶଙ୍କା ଦେଖାଯାଇଛି। ଉଭୟ ଆହତ ହୋଇଛନ୍ତି। ବାମ ହାତର ବୁଢ଼ା ଆଙ୍ଗୁଠିରେ ଆଘାତ ପାଇଥିବା ଭୁବନେଶ୍ୱର କୁମାର ଅତିକମରେ ତିନି ସପ୍ତାହ ପର୍ଯ୍ୟନ୍ତ ଖେଳି ପାରିବେ ନାହିଁ ବୋଲି ସ୍ପଷ୍ଟ ହୋଇଯାଇଥିବା ବେଳେ ରାହାଣେଙ୍କ ଉପରେ ଆଶଙ୍କା ଜାରି ରହିଥିବାରୁ ତାଙ୍କ ସ୍ଥାନରେ ଗୁରକୀରତ ସିଂହ ମାନଙ୍କୁ କଭର୍ ଖେଳାଳି ଭାବେ ଚୟନ କରାଯାଇଛି। ଆଜି ବିସିସିଆଇ ପକ୍ଷରୁ ଏ ସୂଚନା ଦିଆଯାଇଛି।

ବିସିସିଆଇ ସଂପାଦକ ଅନୁରାଗ ଠାକୁରଙ୍କ ପକ୍ଷରୁ ଜାରି କରାଯାଇଥିବା ଏକ ବିବୃତ୍ତିରେ କୁହାଯାଇଛି, ଅଷ୍ଟ୍ରେଲିଆ ବିପକ୍ଷରେ ଟି-ଟ୍ୱେଣ୍ଟି ସିରିଜରେ ଭୁବନେଶ୍ୱର କୁମାରଙ୍କ ସ୍ଥାନରେ ରିଷି ଧାୱନଙ୍କୁ ସୁଯୋଗ ଦିଆଯାଇଛି। ଭୁବନେଶ୍ୱର କୁମାର ଆହତ ଅଛନ୍ତି। ସେହିପରି ଅଷ୍ଟ୍ରେଲିଆ ବିପକ୍ଷରେ କାନବେରାରେ ଚତୁର୍ଥ ଦିନିକିଆ ମ୍ୟାଚରେ ଫିଲ୍ଡି କରିବା ବେଳେ ଆହତ ହୋଇଥିବା ଆଜିଙ୍କ୍ୟ ରାହାଣେଙ୍କ ସ୍ଥାନରେ ଗୁରକୀରତଙ୍କୁ କଭର ଖେଳାଳି ଭାବେ ଚୟନ କରାଯାଇଛି। ରାହାଣେ ଫିଟ୍ ନ ହେଲେ ଗୁରକୀରତ ଖେଳିବେ।

ଆଜି ମଧ୍ୟ ଅଷ୍ଟ୍ରେଲିଆ ବିପକ୍ଷ ପଞ୍ଚମ ତଥା ଶେଷ ଦିନିକିଆରେ ଭୁବନେଶ୍ୱର କୁମାର ଓ ରାହାଣେ ଖେଳି ନ ଥିଲେ।

ସୁସ୍ଥ ହେବା ପାଇଁ ଭୁବନେଶ୍ୱର କୁମାରଙ୍କୁ ଅତି କମରେ ତିନି ସପ୍ତାହ ଲାଗିବ ବୋଲି ବିସିସିଆଇ ପକ୍ଷରୁ କୁହାଯାଇଛି। ଏପରିକି ସେ ଶ୍ରୀଲଙ୍କା ବିପକ୍ଷ ସିରିଜରେ ମଧ୍ୟ ଖେଳିବା ନେଇ ଆଶଙ୍କା ଦେଖାଯାଇଛି। ଅଷ୍ଟ୍ରେଲିଆ ଗସ୍ତ ପରେ ଟିମ୍ ଇଣ୍ଡିଆ ଶ୍ରୀଲଙ୍କା ଯିବ।