ସୌରଭ ଗାଙ୍ଗୁଲିଙ୍କ ଉପରେ ୧୦ ହଜାର ଟଙ୍କା ଜରିମାନା

କୋଲକାତା: ବିସିସିଆଇ ଅଧ୍ୟକ୍ଷ ତଥା ଭାରତୀୟ କ୍ରିକେଟ ଦଳର ପୂର୍ବତନ କ୍ୟାପ୍‌ଟେନ ସୌରଭ ଗାଙ୍ଗୁଲିଙ୍କ ଉପରେ ଜରିମାନା। କୋଲକାତା ହାଇକୋର୍ଟ ତାଙ୍କ ଉପରେ ୧୦,୦୦୦ ଟଙ୍କାର ଜରିମାନା ଲଗାଇଛନ୍ତି। ତାଙ୍କ ସହ ପଶ୍ଚିମବଙ୍ଗ ସରକାର ଏବଂ ଗୃହ ନିଗମ ହିଡ୍‌କୋ ଉପରେ ମଧ୍ୟ ୫୦,୦୦୦ ଟଙ୍କାର ଜରିମାନା ଲଗାଇଛନ୍ତି। ଭୁଲ୍‌ ଜମି ଆବଣ୍ଟନ ମାମଲାକୁ ନେଇ କୋର୍ଟ ଏହି ଫାଇନ୍‌ ଲଗାଇଛନ୍ତି।

ସୂଚନା ମୁତାବକ ସୌରଭ ଗାଙ୍ଗୁଲିଙ୍କୁ କ୍ରିକେଟ ଆକାଡେମୀ ଖୋଲିବା ପାଇଁ ପଶ୍ଚିମବଙ୍ଗ ସରକାରର ଆବାସ ନିଗମ ହିଡ୍‌କୋ ସଲ୍ଟଲେକର ସିଏ ବ୍ଲକରେ ଏକ ଜମି ଦେଇଥିଲା। କିନ୍ତୁ ବିବାଦ ପରେ ସୌରବ ଗାଙ୍ଗୁଲି ସେହି ଜମିକୁ ଫେରାଇ ଦେଇଥିଲେ। ଏହି ସମୟ ମଧ୍ୟରେ ସେହି ଜମିକୁ ନେଇ ଆଇନଗତ ସମସ୍ୟା ଦେଖାଦେଇଥିଲା। ବିନା ଟେଣ୍ଡରରେ ଉକ୍ତ ଜମି ସୌରଭ ଗାଙ୍ଗୁଲିଙ୍କୁ ଦିଆଯାଇଥିବା ନେଇ ଅଭିଯୋଗ ହୋଇଥିଲା। ‘ସଲ୍ଟଲେକ୍ ହ୍ୟୁମାନିଟି’ ନାମକ ଏକ ସ୍ୱେଚ୍ଛାସେବୀ ସଂଗଠନ ରାଜ୍ୟ ସରକାରଙ୍କ ବିରୋଧରେ ମାମଲା ଦାୟର କରିଥିଲା। ଏହି ମାମଲାର ଶୁଣାଣି କରି ଆଜି କୋଲକାତା ହାଇକୋର୍ଟ ଉଭୟ ସୌରଭ ଗାଙ୍ଗୁଲି ଏବଂ ପଶ୍ଚିମବଙ୍ଗ ସରକାରଙ୍କ ଆବାସ ନିଗମ ଠାରୁ ଜରିମାନା ଆଦାୟ କରିବା ପାଇଁ ନିର୍ଦ୍ଦେଶ ଦେଇଛନ୍ତି।

ମାମଲାର ଶୁଣାଣି କରି କୋର୍ଟ କହିଛନ୍ତି, ଦେଶ ସବୁବେଳେ ଖେଳାଳିଙ୍କ ପାଇଁ ଛିଡା ହୋଇଛି। ବିଶେଷକରି ଯେଉଁମାନେ ଆନ୍ତର୍ଜାତୀୟ ସ୍ତରରେ ଦେଶକୁ ପ୍ରତିନିଧିତ୍ୱ କରନ୍ତି। ଏହା ସତ୍ୟ ଯେ ସୌରଭ ଗାଙ୍ଗୁଲି କ୍ରିକେଟରେ ଦେଶ ପାଇଁ ଗୌରବ ଆଣିଛନ୍ତି, କିନ୍ତୁ ଯେତେବେଳେ ଆଇନ ଏବଂ ନିୟମ କଥା ଆସେ ସେତେବେଳେ ସମ୍ବିଧାନରେ ସବୁକିଛି ସମାନ। କେହି ମଧ୍ୟ ଆଇନ୍‌ ଉପର ନୁହନ୍ତି।

ସୂଚନା ମୁତାବକ, ୨୦୧୧ ମସିହାରେ ସୌରଭ ଗାଙ୍ଗୁଲିଙ୍କ ଶିକ୍ଷାନୁଷ୍ଠାନକୁ କୋଲକାତାର ନ୍ୟୁ ଟାଉନ୍ ଅଞ୍ଚଳରେ ପଶ୍ଚିମବଙ୍ଗ ସରକାର ଜମି ପ୍ରଦାନ କରିଥିଲେ। ଏହି ବିଦ୍ୟାଳୟ ପାଇଁ ବିସିସିଆଇ ସଭାପତି ତଥା ଗାଙ୍ଗୁଲି ଶିକ୍ଷା ଏବଂ କଲ୍ୟାଣ ସମିତିକୁ ଦିଆଯାଇଥିବା ୨.୫ ଏକର ଜମି ଉପରେ ଏକ ଆବେଦନରେ ପ୍ରଶ୍ନ ଉଠାଯାଇଛି। ୨୦୧୬ରେ ଏହି ଜମି ଆବଣ୍ଟନକୁ ଚ୍ୟାଲେଞ୍ଜ କରି ଏକ ପିଏଲ୍ ଦାଖଲ କରାଯାଇଥିଲା।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।