ମାତ୍ର ୨୫ ବଲରେ ଶତକ ମାରି ବିଶ୍ୱ ରେକର୍ଡ କଲେ ଏହି ବ୍ୟାଟ୍ସମ୍ୟାନ୍

ନୂଆଦିଲ୍ଲୀ: ସ୍କଟଲ୍ୟାଣ୍ଡ ବ୍ୟାଟ୍ସମ୍ୟାନ୍ ଜର୍ଜ ମୁନସେ ଟି-୨୦ କ୍ରିକେଟରେ ନୂଆ ବିଶ୍ୱ କୀର୍ତ୍ତିମାନ ସ୍ଥାପନ କରିଛନ୍ତି। ସେ ମାତ୍ର ୨୫ ବଲରେ ଶତକ ମାରି ନୂଆ ବିଶ୍ୱ ରେକର୍ଡ କରିଛନ୍ତି। ଏହାଛଡ଼ା ସେ ଗୋଟିଏ ଓଭରରେ ୬ ଛକା ମାରିବାର ନୂଆ କାରନାମା କରିଛନ୍ତି।

ଗ୍ଲସେଷ୍ଟରଶାୟାର ସେକେଣ୍ଡ ଇଲେଭେନ୍ ଓ ବାଥ୍ ସିସି ମଧ୍ୟରେ ହୋଇଥିବା ଅନଅଫିସିଆଲ୍ ଟି-୨୦ ମ୍ୟାଚରେ ମୁନସେ ମାତ୍ର ୩୯ ବଲରେ ୧୪୭ ରନର ବିସ୍ଫୋରକ ଇନିଂସ୍ ଖେଳିଥିଲେ। ମୁନସେ ନିଜର ଏହି ମାରାଥନ ଇନିଂସ୍ ମଧ୍ୟରେ ୫ ଚୌକା ଓ ୨୦ ଛକା ମାରିଛନ୍ତି।

ଏହି ମ୍ୟାଚରେ ମଇଦାନକୁ ବ୍ୟାଟିଂ କରିବାକୁ ଆସିବା ମାତ୍ରକେ ମୁନସେ ପ୍ରତିପକ୍ଷ ବୋଲରଙ୍କୁ ଆକ୍ରମଣ କରିଥିଲେ। ସେ ମାତ୍ର ୧୭ ବଲରେ ଅର୍ଦ୍ଧଶତକ ମାରିବା ପରେ ଶତକ ପୂରଣ ପାଇଁ ମାତ୍ର ୭ ବଲ ଖେଳିଥିଲେ। ଏହା ମଧ୍ୟରେ ସେ ଗୋଟିଏ ଓଭରରେ ୬ ଛକା ମଧ୍ୟ ମାରିଥିଲେ।

ମୁନସେ ଓ ଜିପି ୱିଲୋଜ (୭୨)ଙ୍କ ଦମଦାର ବ୍ୟାଟିଂ ବଳରେ ଗ୍ଲସେଷ୍ଟରଶାୟାର ଟିମ୍ ୨୦ ଓଭରରେ ୩ ୱିକେଟ୍ ହରାଇ ୩୨୬ ରନ୍ କରିଥିଲା। ସ୍କଟଲ୍ୟାଣ୍ଡ୍ ପକ୍ଷରୁ ୨୬ ଟି-୨୦ ଅନ୍ତର୍ଜାତୀୟ ମ୍ୟାଚ୍ ଖେଳିଥିବା ମୁନସେ ୧୫୦.୬୭ ଷ୍ଟ୍ରାଇକରେଟରେ ୫୫୯ ରନ୍ କରିଛନ୍ତି। ଜବାବରେ ବାଥ୍ ବିସି ନିର୍ଦ୍ଧାରିତ ଓଭରରେ ୮ ୱିକେଟ୍ ହରାଇ ୨୧୪ ରନ୍ କରିବାକୁ ସକ୍ଷମ ହୋଇଥିଲା।

ଟି-୨୦ରେ କ୍ରିକେଟରେ ଦ୍ରୁତ ଶତକର ରେକର୍ଡ କ୍ରିସ୍ ଗେଲଙ୍କ ନାମରେ ରହିଛି। ୨୦୧୩ ଆଇପିଏଲରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ପକ୍ଷରୁ ଖେଳି ଗେଲ୍ ପୁନେ ୱାରିୟର୍ସ ବିପକ୍ଷରେ ମାତ୍ର ୩୦ ବଲରେ ଶତକ ମାରିଥିଲେ।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।