ଲର୍ଡ୍ସ: ଚଳିତ ଆଇସିସି ବିଶ୍ୱକପର ଆଜି ଏକ ଗୁରୁତ୍ୱପୂର୍ଣ୍ଣ ମ୍ୟାଚରେ ପାକିସ୍ତାନ ବାଂଲାଦେଶକୁ ଭେଟିଛି। ବିଶ୍ୱକପ୍ ସେମିଫାଇନାଲରେ ପହଞ୍ଚିବା ପାଇଁ ପାକିସ୍ତାନକୁ ବଡ଼ ସ୍କୋରର ଆବଶ୍ୟକ ଥିଲା। କିନ୍ତୁ ପାକିସ୍ତାନ ଟିମ୍ ନିର୍ଦ୍ଧାରିତ ୫୦ ଓଭରରେ ୯ ୱିକେଟ୍ ହରାଇ ୩୧୫ ରନ୍ କରିବାକୁ ସକ୍ଷମ ହୋଇଛି।
ଫଳରେ ପାକିସ୍ତାନକୁ ସେମିଫାଇନାଲ୍ ଟିକେଟ୍ ହାସଲ କରିବାକୁ ହେଲେ ବାଂଲାଦେଶକୁ ୭ ରନ୍ ଭିତରେ ଅଲଆଉଟ୍ କରିବାକୁ ପଡ଼ିବ, ଯାହାକି ଅସମ୍ଭବ। ତେଣୁ ଜାଣିବା ଦରକାର ଯେ ପାକିସ୍ତାନର ସେମିଫାଇନାଲ୍ ଆଶା ଶେଷ ହୋଇଛି। ପାକିସ୍ତାନ ପକ୍ଷରୁ ଇମାମ୍-ଉଲ୍-ହକ୍ ଶତକ ମାରିଥିବା ବେଳେ ବାବର ଆଜମ ବଞ୍ଚିତ ହୋଇଥିଲେ। ଇମାମ୍ ୧୦୦ ବଲରେ ୭ ଚୌକା ସହ ୧୦୦ ରନ୍ କରି ଆଉଟ୍ ହୋଇଥିଲେ।
ଲର୍ଡ୍ସରେ ଖେଳାଯାଇଥିବା ଏହି ମ୍ୟାଚରେ ପାକିସ୍ତାନ କ୍ୟାପଟେନ୍ ସର୍ଫରାଜ ଅହମ୍ମଦ ଟସ୍ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲେ। ବଡ଼ ସ୍କୋର ଆଶାରେ ଖେଳୁଥିବା ପାକିସ୍ତାନକୁ ପ୍ରାରମ୍ଭିକ ଝଟକା ଲାଗିଥିଲା। ଟିମର ଷ୍ଟାର୍ ଓପ୍ନର ଫକର ଜମାନ୍ ମାତ୍ର ୧୩ ରନ୍ କରି ମହମ୍ମଦ ସୈଫୁଦ୍ଦିନଙ୍କ ବଲରେ ଆଉଟ୍ ହୋଇଥିଲେ।
ତେବେ ଅନ୍ୟତମ ଓପ୍ନର ଇମାମ୍-ଉଲ୍-ହକ୍ ଓ ବାବର ଆଜମ ଧୈର୍ଯ୍ୟର ସହ ବ୍ୟାଟିଂ କରିଥିଲେ। ଦୁହେଁ ଜାଣିସାରିଥିଲେ ଯେ, ଏଠାରେ ବଡ଼ ସ୍କୋର କରିବା ଅସମ୍ଭବ। ତେଣୁ ଇମାମ୍ ଓ ବାବର ଆକ୍ରମଣାତ୍ମକ ଧିମା ବ୍ୟାଟିଂ କରିଥିଲେ । ଦୁହେଁ ଦ୍ୱିତୀୟ ୱିକେଟ୍ ପାଇଁ ୧୫୭ ରନର ଶତକୀୟ ଭାଗୀଦାରୀ କରିଥିଲେ। ବାବର ୯୬ (୯୮ ବଲ୍, ୧୧ ଚୌକା) ରନ୍ କରି ଶତକରୁ ବଞ୍ଚିତ ରହିଥିଲେ। ତାଙ୍କୁ ସୈଫୁଦ୍ଦିନ ପ୍ୟାଭିଲିୟନ୍ ପଠାଇଥିଲେ।
ଏହା ପରେ ଇମାମ୍ ନିଜର ପ୍ରଥମ ବିଶ୍ୱକପ୍ ଶତକ ପୂରଣ କରିଥିଲେ, କିନ୍ତୁ ତାଙ୍କର ଏହି ଖୁସି ବେଶୀ ସମୟ ତିଷ୍ଠିନଥିଲା। ଶତକ ମାରିବାର ପରବର୍ତ୍ତୀ ବଲରେ ମୁସ୍ତାଫିଜୁର ରେହମାନଙ୍କ ବଲରେ ଇମାମ୍ ହିଟ୍ ୱିକେଟ୍ ହୋଇଥିଲେ। ତାଙ୍କ ଆଉଟ୍ ବେଳକୁ ପାକିସ୍ତାନର ସ୍କୋର ୪୧.୫ ଓଭରରେ ୨୪୬ ରନରେ ଥିଲା। ଏହା ପରେ ଟିମ୍ ଲଗାତାର ଦୁଇଟି ୱିକେଟ୍ ହରାଇ ବସିଥିଲା। ମହମ୍ମଦ ହଫିଜ୍ (୨୭) ଓ ହାରିସ୍ ସୋହେଲ (୬) ନିରାଶ କରିଥିଲେ।
ତେବେ ଅଲରାଉଣ୍ଡର ଇମାଦ ୱାସିମ୍ ଆକ୍ରମଣାତ୍ମକ ବ୍ୟାଟିଂ କରି ପାକିସ୍ତାନ ସ୍କୋରକୁ ୩୦୦ ଅତିକ୍ରମ କରାଇଥିଲେ । ସେ ୨୬ ବଲରେ ୬ ଚୌକା ଓ ୧ ଛକା ସହ ୪୩ ରନ୍ କରି ମୁସ୍ତାଫିଜୁରଙ୍କ ଶିକାର ହୋଇଥିଲେ । ମହମ୍ମଦ ଆମୀର ୮, ୱାହାବ ରିଆଜ ୨ ଓ ଶଦାବ ଖାନ୍ ୧ ରନ୍ କରି ଆଉଟ୍ ହୋଇଥିଲେ। କ୍ୟାପଟେନ୍ ସର୍ଫରାଜ ଅହମ୍ମଦ (୩*) ରିଟାୟର୍ଡ ହର୍ଟ ହୋଇଥିବା ବେଳେ ଶେଷ ବଲରେ ବ୍ୟାଟିଂ କରିବାକୁ ଆସିଥିଲେ। ବାଂଲାଦେଶ ପକ୍ଷରୁ ମୁସ୍ତାଫିଜୁର ୫ଟି ଓ ସୈଫୁଦ୍ଦିନ ୩ଟି ୱିକେଟ୍ ନେଇଥିଲେ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।