ଫ୍ଲରିଡା: ବୋଲରଙ୍କ ଦମରେ ପ୍ରଥମେ ଟି-୨୦ରେ ୱେଷ୍ଟଇଣ୍ଡିଜ୍କୁ ୪ ୱିକେଟ୍ରେ ପରାସ୍ତ କରିଛି ଟିମ୍ ଇଣ୍ଡିଆ। ଟିମ୍ ଇଣ୍ଡିଆ ପକ୍ଷରୁ ଡେବ୍ୟୁ କରିଥିବା ନଭଦୀପ ସାଇନ୍ଙ୍କ ଘାତକ ବୋଲିଂ ଯୋଗୁ ୱେଷ୍ଟଇଣ୍ଡିଜ୍ ମାତ୍ର ୯୫ ରନ୍ କରିବାକୁ ସକ୍ଷମ ହୋଇଥିଲା। ୯୬ ରନ୍ର ଟାର୍ଗେଟ ପାଇଥିବା ଟିମ୍ ଇଣ୍ଡିଆ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଥିଲେ ହେଁ ଶେଷରେ ୧୬ ବଲ୍ ପୂର୍ବରୁ ବିଜୟ ଲାଭ କରିଛି। ୪ ଓଭର୍ରେ ୧୭ ରନ୍ ଦେଇ ୩ଟି ୱିକେଟ୍ ନେଇଥିବା ନଭଦୀପ ସାଇନିଙ୍କୁ ମ୍ୟାନ ଅଫ୍ ଦି ମ୍ୟାଚ୍ ମିଳିଛି।
ୱେଷ୍ଟଇଣ୍ଡିଜ୍ ଦେଇଥିବା ୯୬ ରନ୍ର ଟାର୍ଗେଟ ପିଛା କରୁଥିବା ଭାରତ ମାତ୍ର ୪ ରନରେ ଓପନର ଶିଖର ଧୱନଙ୍କୁ ହରାଇଥିଲା। ଧୱନ ମାତ୍ର ୧ ରନ୍ କରି ଶେଲଡନ୍ କଟ୍ଟରେଲଙ୍କ ବଲରେ ଏଲବିଡବ୍ଲ୍ୟୁ ହୋଇ ପ୍ୟାଭିଲିୟନ ଫେରିଥିଲେ।
ଅନ୍ୟତମ ଓପନର ରୋହିତ ଶର୍ମା ବଡ଼ ଶଟ୍ ଖେଳି ଦଳୀୟ ସ୍କୋରକୁ ଆଗକୁ ନେଇଥିଲେ। ରୋହିତଙ୍କୁ ଅଧିନାୟକ ବିରାଟ କୋହଲି ଭରପୂର ସହଯୋଗ କରିଥିଲେ। ହେଲେ ବଡ଼ ଶଟ୍ ଖେଳିବା ଲୋଭରେ ରୋହିତ ୨୪ ରନ୍ କରି ସୁନୀଲ ନାରିନଙ୍କୁ ବଲରେ ଆଉଟ୍ ହୋଇଯାଇଥିଲେ। ଏହାପରେ ପ୍ରଥମ ବଲରେ ହିଁ ରିଷଭ ପନ୍ତ ଖାତା ଖୋଲିବା ପୂର୍ବରୁ ନାରିନଙ୍କ ଦ୍ୱିତୀୟ ଶିକାର ହୋଇଥିଲେ।
ଟିମ୍ ଇଣ୍ଡିଆ ୬.୪ ଓଭର୍ରେ ୩୨ ରନ୍ କରି ୩ ୱିକେଟ୍ ହରାଇଥିଲା। ତେବେ ବିରାଟ୍ ଓ ମନୀଷ ପାଣ୍ଡେ ସ୍ଥିତି ସମ୍ଭାଳିବା ସହ ଦଳୀୟ ସ୍କୋରକୁ ଆଗକୁ ନେଇଥିଲେ। ଦଳୀୟ ସ୍କୋର ୬୪ ଥିବା ବେଳେ ବ୍ୟକ୍ତିଗତ ୧୯ ରନ୍ କରିଥିବା ମନୀଷ ପାଣ୍ଡେଙ୍କୁ କୀମୋ ପଲ କ୍ଲିନବୋଲ୍ଡ କରି ଭାରତକୁ ୪ର୍ଥ ଝଟ୍କା ଦେଇଥିଲେ।
ବିରାଟ୍ ମଧ୍ୟ ୧୯ ରନ୍ କରି କଟ୍ଟରେଲଙ୍କ ଦ୍ୱିତୀୟ ଶିକାର ହୋଇଥିଲେ। ଭାରତର ସ୍କୋର ୬୯/୫ ଥିବା ବେଳେ ଦୁଇ ବାମହାତୀ ଅଲରାଉଣ୍ଡର ରବୀନ୍ଦ୍ର ଜାଡେଜା ଓ କୃନାଲ ପାଣ୍ଡ୍ୟା ବେଶ ଦୃଢ଼ତାର ସହ ଇଣ୍ଡିଜ୍ ବୋଲରଙ୍କୁ ମୁକାବିଲା କରିଥିଲେ। ଜିତିବା ପାଇଁ ୮ ରନ୍ ଦରକାର ଥିବା ବେଳେ ପାଣ୍ଡ୍ୟା ୧୨ ରନ୍ କରି କୀମ ପୋଲଙ୍କ ବଲ୍ରେ ବୋଲ୍ଡ ହୋଇଯାଇଥିଲେ।
ରବୀନ୍ଦ୍ର ଜାଡେଜା ଶେଷ ଯାଏ ୧୦ ରନ୍ କରି ଅପରାଜିତ ରହିଥିବା ବେଳେ ୱାଶିଂଟନ୍ ସୁନ୍ଦର ଛକା ମାରି ଭାରତକୁ ବିଜୟୀ କରାଇଥିଲେ।
ଇଣ୍ଡିଜ୍ ପକ୍ଷରୁ କଟ୍ଟରେଲ, ପଲ ଓ ସୁନୀଲ ନାରିନ୍ ଦୁଇଟି ଲେଖାଏ ୱିକେଟ୍ ନେଇଥିଲେ।
ଏହାପୂର୍ବରୁ ଟସ୍ ଜିତି ପ୍ରଥମେ ବ୍ୟାଟିଂ କରୁଥିବା ଇଣ୍ଡିଜ୍ ଟିମ୍ କାଏରନ୍ ପୋଲାର୍ଡଙ୍କ ୪୯ ରନ୍ ବଳରେ ନିର୍ଦ୍ଧାରିତ ୨୦ ଓଭର୍ରେ ୯୫ ରନ୍ କରିବାକୁ ସକ୍ଷମ ହୋଇଥିଲା। ୱେଷ୍ଟଇଣ୍ଡିଜ୍ ୬ ଓଭର୍ ଶେଷ ସୁଦ୍ଧା ୩୩ ରନ୍ କରି ୫ ୱିକେଟ୍ ହରାଇଥିଲା। ତେବେ ପୋଲାର୍ଡ ଲଢ଼େଇ କରିବାରୁ ଇଣ୍ଡିଜ୍ ୯୫ ରନ୍ କରିବାକୁ ସକ୍ଷମ ହୋଇଥିଲା।
ଭାରତ ପକ୍ଷରୁ ସାଇନି ସର୍ବାଧିକ ୩ଟି ୱିକେଟ୍ ନେଇଥିବା ବେଳେ ଭୁବନେଶ୍ୱର କୁମାର ୨ଟି, ଖଲୀଲ ଅହମ୍ମଦ, ରବୀନ୍ଦ୍ର ଜାଡେଜା, ୱାଶିଂଟନ୍ ସୁନ୍ଦର ଓ କୃନାଲ ପାଣ୍ଡ୍ୟା ଗୋଟିଏ ଲେଖାଏ ୱିକେଟ୍ ନେଇଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
