ଧର୍ମଶାଳା: ହିମାଚଳପ୍ରଦେଶର ଧର୍ମଶାଳାରେ ଆଜି ଅନୁଷ୍ଠିତ ନ୍ୟୁଜିଲାଣ୍ଡ ବିପକ୍ଷ ପ୍ରଥମ ଦିନିକିଆକୁ ଭାରତ ୬ ୱିକେଟ୍ରେ ଜିତି ନେଇଛି। ୮୩ ବଲ୍ରେ ୯ ଚୌକା ଓ ଗୋଟିଏ ଛକା ସହାୟତାରେ ଅପରାଜିତ ୮୫ ରନ୍ କରି ବିରାଟ୍ କୋହଲି ଭାରତ ବିଜୟରେ ମୁଖ୍ୟ ଭୁମିକା ନେଇଥିଲେ। ୭ ଓଭରରେ ୩୧ ରନ୍ ଦେଇ ନ୍ୟୁଜିଲାଣ୍ଡର ୩ଟି ୱିକେଟ୍ ଅକ୍ତିଆର କରିଥିବା ହାର୍ଦ୍ଦିକ ପାଣ୍ଡିଆ ମ୍ୟାନ ଅପ୍ ଦି ମ୍ୟାଚ୍ ହୋଇଥିଲେ।
ରୋହିତ ଶର୍ମା ୨୬ ବଲ୍ରୁ ଗୋଟିଏ ଲେଖାଏଁ ଚୌକା ଓ ଛକା ବଳରେ ୧୪ ରନ୍ କରିଥିବା ବେଳେ ଆଜିଙ୍କ୍ୟ ରାହାଣେ ୩୪ ବଲରୁ ୩୩ (୪ ଚୌକା ଓ ୨ ଛକା), ମନିସ ପାଣ୍ଡେ ୨୨ ବଲରୁ ୧୭ ରନ୍ (ଗୋଟିଏ ଛକା) ଏବଂ ଅଧିନାୟକ ମହେନ୍ଦ୍ର ସିଂ ଧୋନି ୨୪ ବଲରୁ ୨୧ ରନ୍ (ଗୋଟିଏ ଚୌକା ଓ ଗୋଟିଏ ଛକା) କରିଥିଲେ। କେଦାର ଯାଦବ ୧୦ ବଲରୁ ୧୦ ରନ୍ (୨ ଚୌକା) କରି ଅପରାଜିତ ରହିଥିଲେ।
ଆଜି ଟସ୍ ଜିତି ଭାରତ ଫିଲ୍ଡିଂ କରିବାକୁ ନିଷ୍ପତ୍ତି ନେଇଥିଲା। ଭାରତୀୟ ବୋଲରଙ୍କ ମୁକାବିଲା କରି ନ ପାରି ନ୍ୟୁଜିଲାଣ୍ଡ ଦଳ ୪୩.୫ ଓଭରରେ ୧୯୦ ରନ୍ କରି ଅଲ୍ଆଉଟ୍ ହୋଇଯାଇଥିଲେ। ଦଳ ପକ୍ଷରୁ ଟମ୍ ଲାଥମ୍ ୯୮ ବଲ୍ରୁ ୭ ଚୌକା ଓ ଗୋଟିଏ ଛକା ସହାୟତାରେ ସର୍ବାଧିକ ଅପରାଜିତ ୭୯ ରନ୍ କରିଥିଲେ। ୧୦ମ ସ୍ଥାନରେ ଆସିଥିବା ଟିମ୍ ସାଉଥି ୪୫ ବଲ୍ରୁ ୫୫ ରନ୍ (୬ ଚୌକା, ୩ ଛକା) କରିବା ଯୋଗୁଁ ଦଳ ୧୫୦ ରନ୍ ଅତିକ୍ରମ କରିବାକୁ ସକ୍ଷମ ହୋଇଥିଲା। ଅନ୍ୟ କୌଣସି ବ୍ୟାଟ୍ସମ୍ୟାନ ଭାରତୀୟ ବୋଲରଙ୍କ ମୁକାବିଲା କରିପାରି ନ ଥିଲେ। ୬ ଜଣ ବ୍ୟାଟ୍ସମ୍ୟାନ ଦୁଇଅଙ୍କ ଛୁଇଁବାକୁ ସକ୍ଷମ ହୋଇ ନ ଥିଲେ।
ଭରତ ପକ୍ଷରୁ ହାର୍ଦ୍ଦିକ ଏବଂ ଅମିତ ମିଶ୍ରା ୩ଟି ଲେଖାଏଁ ୱିକେଟ୍ ନେଇଥିଲେ। ଉମେଶ ଯାଦବ ଏବଂ କେଦାର ଜାଭେଦ୍ ୨ଟି ଲେଖାଏଁ ୱିକେଟ୍ ଅକ୍ତିଆର କରିଥିଲେ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।