ଅଲିମ୍ପିକ ଟେଷ୍ଟ: ଜାପାନକୁ ୨-୧ରେ ହରାଇଲା ଭାରତୀୟ ମହିଳା ହକି ଦଳ

ଟୋକିଓ: ବିଜୟରୁ ଅଲିମ୍ପିକ ଟେଷ୍ଟ ଇଭେଣ୍ଟ ଅଭିଯାନ ଆରମ୍ଭ କରିଛି ଭାରତୀୟ ମହିଳା ହକି ଟିମ୍‌। ଆଜିଠାରୁ ଆରମ୍ଭ ହୋଇଥିବା ଏହି ଇଭେଣ୍ଟରେ ଭାରତୀୟ ମହିଳା ହକି ଟିମ୍‌ ଆୟୋଜକ ଜାପାନକୁ ୨-୧ରେ ପରାସ୍ତ କରିଛି।

ମ୍ୟାଚ୍‌ ଆରମ୍ଭରୁ ଭାରତୀୟ ମହିଳା ଟିମ୍‌ ନିଜର ଦବଦବା ଦେଖାଇଥିଲା। ଟିମ୍‌ର ପେନାଲଟି କର୍ଣ୍ଣର ସ୍ପେଶାଲିଷ୍ଟ ଗୁରଜିତ କୌର ମ୍ୟାଚ୍‌ର ୯ ମିନିଟ୍‌ରେ ଗୋଲ ଦେଇ ଭାରତକୁ ୧-୦ରେ ଆଗୁଆ କରିଦେଇଥିଲେ। ତେବେ ୧୬ତମ ମିନିଟ୍‌ରେ ଜାପାନର ଅକି ମିତଶୁହାସି ଚମତ୍କାର ଫିଲ୍ଡ ଗୋଲ କରି ସ୍ଥିତି ୧-୧କୁ ଆଣିଦେଇଥିଲେ।

ଏହାପରେ ଉଭୟ ଦଳ ଅଗ୍ରଣୀ ହେବାକୁ ଚେଷ୍ଟା କରିଥିଲେ। ଭାରତକୁ ମ୍ୟାଚ୍‌ର ୩୫ତମ ମିନିଟ୍‌ରେ ପୁଣିଏକ ପେନାଲଟି କର୍ଣ୍ଣର ମିଳିଥିଲା। ଏହାକୁ ଗୁରଜିତ କୌର ଗୋଲରେ ପରିଣତ କରି ଭାରତକୁ ୨-୧ରେ ଆଗୁଆ କରିଦେଇଥିଲେ।

ଜାପାନ ପକ୍ଷରୁ ସ୍ଥିତି ବରାବର କରିବାକୁ ଚେଷ୍ଟା କରାଯାଇଥିଲେ ହେଁ ଭାରତୀୟ ଡିଫେନ୍ସ ଲାଇନ୍‌କୁ ଭେଦ କରିବା ସହଜ ହୋଇ ନଥିଲା। ଶେଷରେ ଭାରତ ୨-୧ରେ ମ୍ୟାଚ୍‌ଟିକୁ କବଜା କରିଥିଲା।