ନୂଆଦିଲ୍ଲୀ: ପ୍ରଥମ ମ୍ୟାଚରେ ସ୍ପେନ୍ ଠାରୁ ହାରିଥିବା ଭାରତୀୟ ମହିଳା ଦଳ ତୃତୀୟ ମ୍ୟାଚରେ ଏହାର ପ୍ରତିଶୋଧ ନେଇଛି। ଦଳ ତୃତୀୟ ମ୍ୟାଚକୁ ୫-୨ରେ ଜିତି ସିରିଜ୍ ୧-୧ରେ ବରାବର କରିଛି। ଏବେ ୪ର୍ଥ ମ୍ୟାଚ୍ ଆସନ୍ତା ଗୁରୁବାର ଖେଳାଯିବ।
ଭାରତ ପକ୍ଷରୁ ଯୁବ ଷ୍ଟ୍ରାଇକର ଲରେମ ସିମା ୨ଟି ଗୋଲ ଦେଇଥିବା ବେଳେ ନେହା ଗୋଏଲ, ନବନୀତ କୌର ଓ ରାଣୀ ରାମପାଲ ଗୋଟିଏ ଲେଖାଏ ଗୋଲ ଦେଇଛନ୍ତି । ସ୍ପେନ୍ ପକ୍ଷରୁ ବେରାଟା ବୋନାଷ୍ଟ୍ରେ ୨ଟି ଗୋଲ ସ୍କୋର କରିଛନ୍ତି।
ପ୍ରଥମ ମ୍ୟାଚରେ ସ୍ପେନ ଠାରୁ ୨-୩ରେ ହାରିଥିବା ଭାରତୀୟ ମହିଳା ଦଳ ଦ୍ୱିତୀୟ ମ୍ୟାଚ୍ ୧-୧ରେ ଡ୍ର ରଖିଥିଲା। ତୃତୀୟ ମ୍ୟାଚ୍ ଆରମ୍ଭରୁ ରାଣୀ ରାମପାଲଙ୍କ ନେତୃତ୍ୱରେ ଭାରତୀୟ ଟିମ୍ ଜବରଦସ୍ତ ପ୍ରଦର୍ଶନ କରିଥିଲା।
ତେବେ ସ୍ପେନ୍ ପକ୍ଷରୁ ମ୍ୟାଚର ୭ମ ମିନିଟରେ ବୋନାଷ୍ଟ୍ରେ ପ୍ରଥମ ଗୋଲ ସ୍କୋର କରି ଦଳକୁ ୧-୦ରେ ଆଗୁଆ କରି ଦେଇଥିଲେ। ତେବେ ମ୍ୟାଚର ୧୭ତମ ମିନିଟରେ ଭାରତ ପକ୍ଷରୁ ଲରେମ ସିମା ଗୋଲ ସ୍କୋର କରି ସ୍ଥିତି ୧-୧ରେ ବରାବର କରିଦେଇଥିଲେ। ନେହା ୨୧ତମ ମିନିଟରେ ଗୋଲ କରି ଭାରତକୁ ୨-୧ରେ ଆଗୁଆ କରିଦେଇଥିଲେ । କିନ୍ତୁ ବୋନାଷ୍ଟ୍ରେ ୨୫ତମ ମିନିଟରେ ପାଲଟା ଗୋଲ ଦେଇ ସ୍ଥିତି ୨-୨ କରିଦେଇଥିଲେ।
ମ୍ୟାଚ୍ର ୩୨ତମ ମିନିଟରେ ନବନୀତ କୌର ଗୋଲ କରି ଭାରତକୁ ପୁଣି ୩-୨ରେ ଆଗୁଆ କରିଦେଇଥିଲେ। ସ୍ପେନ୍ ସ୍ଥିତି ବରାବର କରିବାକୁ ବାରମ୍ବାର ଚେଷ୍ଟା କରିଥିଲେ ହେଁ ଭାରତୀୟ ରକ୍ଷଣ ବିଭାଗ ସବୁ ଉଦ୍ୟମକୁ ଭଣ୍ଡୁର କରି ଦେଇଥିଲା।
ଅଧିନାୟକ ରାଣୀ ରାମପାଲ ୫୧ ତମ ମିନିଟରେ ଗୋଲ କରି ସ୍ଥିତି ୪-୨ କୁ ଆଣିଥିଲେ। ମ୍ୟାଚ୍ ଶେଷ ହେବାକୁ ୨ ମିନିଟ୍ ବାକି ଥିବାବେଳେ ଲରେମ ସିମା ନିଜର ବ୍ୟକ୍ତିଗତ ଦ୍ୱିତୀୟ ଗୋଲ କରି ଗୋଲ ବ୍ୟବଧାନ ୫-୨ରେ ପହଞ୍ଚାଇଥିଲେ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
