ଲଣ୍ଡନ୍: ଟିମ୍ ଶ୍ରୀଲଙ୍କାର ମହାନ୍ କ୍ରିକେଟର୍ ସନଥ ଜୟସୁରିୟା ଆଇସିସି ଦୁର୍ନୀତି ନିରୋଧକ କୋଡ୍ର ଦୁଇ ଦୁଇଟି ନିୟମକୁ ଉଲ୍ଲଙ୍ଘନ କରିଛନ୍ତି। ତେବେ ଏସଂକ୍ରାନ୍ତରେ ମତ ରଖିବାକୁ ତାଙ୍କୁ ଆଜିଠାରୁ ଆଇସିସି ପକ୍ଷରୁ ୧୪ ଦିନର ମହଲତ ଦିଆଯାଇଛି।
ସନଥ ଜୟସୁରିୟା ୨୦୧୭ ମସିହା ସେପ୍ଟେମ୍ବର ମାସ ଯାଏ ଟିମ୍ ଶ୍ରୀଲଙ୍କାର ଚୟନ କମିଟି ଅଧ୍ୟକ୍ଷ ଭାବେ କାର୍ଯ୍ୟ କରୁଥିଲେ। ତେବେ ଅପ୍ରତ୍ୟାଶିତ ଭାବେ ଜୟସୁରିୟାଙ୍କ ସମେତ ଚୟନ କମିଟିରେ ଥିବା କିଛି ସଦସ୍ୟ ଇସ୍ତଫା ଦେଇଥିଲେ।
ତେବେ ଜୟସୁରିୟାଙ୍କ କାର୍ଯ୍ୟକାଳ ସମୟରେ ବ୍ୟାପକ ଦୁର୍ନୀତି ହୋଇଥିବା ଅଭିଯୋଗ ହୋଇଥିଲା। ଏହାର ତଦନ୍ତ ଆଇସିସିର ଦୁର୍ନୀତି ନିରୋଧକ ସଂସ୍ଥା ପକ୍ଷରୁ ଆରମ୍ଭ ହୋଇଥିଲା। ଜୟସୁରିୟାଙ୍କୁ ତଦନ୍ତକାରୀ ସଂସ୍ଥା ଫୋନ୍ ମାଗିଥିଲେ ହେଁ ସେ ଏକବର୍ଷ ଧରି ଏହାକୁ ଖାତିର କରି ନଥିଲେ।
ଏଥିସହ ଜାଣିଶୁଣି ତଦନ୍ତକୁ ବିଳମ୍ବ କରିବା ସହ ଉପଯୁକ୍ତ ଦସ୍ତାବିଜ୍ ନଷ୍ଟ କରିଦେଇଥିବା ମଧ୍ୟ ଅଭିଯୋଗ ଆସିଥିଲା। ଏଭଳି କରି ସେ ଆଇସିସିର ଧାରା ୨.୪.୬ ଓ ଧାରା ୨.୪.୭ ଉଲ୍ଲଙ୍ଘନ କରିଛନ୍ତି।
ଏବେ ଆଇସିସି ପୁଣି ଜୟସୁରିୟାଙ୍କୁ ୧୪ ଦିନର ମହଲତ ଦେଇଛି। ତେବେ ଯଦି ସେ ଏହାର ଜବାବ ନ ଦିଅନ୍ତି, ତା’ହେଲେ ତାଙ୍କ ବିରୋଧରେ କ’ଣ କାର୍ଯ୍ୟାନୁଷ୍ଠାନ ହେବ, ସେ ସମ୍ପର୍କରେ ଆଇସିସି ପକ୍ଷରୁ କୁହାଯାଇନାହିଁ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।