ମହିଳା ଟି-ଟ୍ୱେଣ୍ଟି ସିରିଜ୍: ଅଷ୍ଟ୍ରେଲିଆକୁ ୫ ୱିକେଟରେ ହରାଇଲା ଭାରତ

ଆଡିଲେଡ୍: ସାଧାରଣତନ୍ତ୍ର ଦିବସ ଅବସରରେ ଆଡିଲେଡରେ ଆଜି ଭାରତକୁ ମିଳିଛି ଡବଲ୍ ଖୁସି। ଗୋଟିଏ ପଟେ ଭାରତୀୟ ପୁରୁଷ ଦଳ ଟି-ଟ୍ୱେଣ୍ଟିରେ ଅଷ୍ଟ୍ରେଲିଆକୁ ହରାଇଥିବା ବେଳେ ମହିଳା ଦଳ ବି ପଛରେ ପଡିଯାଇନି। ମହିଳା ଟିମ୍ ବି ଅଷ୍ଟ୍ରେଲିଆକୁ ପରାସ୍ତ କରିଛି। ଦଳ ୫ ୱିକେଟରେ ଜିତି ଯାଇଛି ସିରିଜର ପ୍ରଥମ ମ୍ୟାଚ।

ଭାରତ ପକ୍ଷରୁ ନିମନ୍ତ୍ରଣ ପାଇ ଅଷ୍ଟ୍ରେଲିଆ ପ୍ରଥମେ ବ୍ୟାଟିଂ କରି ନିର୍ଦ୍ଧାରିତ ୨୦ ଓଭରରେ ୫ଟି ୱିକେଟ ହରାଇ ୧୪୦ ରନ ଟାର୍ଗେଟ ଦେଇଥିଲା। ଦଳ ପକ୍ଷରୁ ବେଥ୍ ମୋନ୍ନୀ ୩୮ ବଲରୁ ୩୬ ରନ୍, ଆଲେକ୍ସ ବ୍ଲାକୱେଲ୍ ୨୨ ବଲରୁ ଅପରାଜିତ ୨୭ ଓ ହେଲି ୧୫ ବଲରୁ ଅପରାଜିତ ୪୧ ରନ କରିଥିଲେ। ଭାରତ ପକ୍ଷରୁ ପୁନମ୍ ଯାଦବ୍ ୨ଟି ୱିକେଟ, ଏ ଏ ପାଟିଲ, ଶିଖା ପାଣ୍ଡେ ଓ ଝୁଲନ୍ ଗୋସ୍ୱାମୀ ଗୋଟିଏ ଲେଖାଏଁ ୱିକେଟ ଅକ୍ତିଆର କରିଥିଲେ।

ଭାରତୀୟ ଦଳ ଟାର୍ଗେଟକୁ ପିଛା କରି ୧୮.୪ ଓଭରରେ ୫ଟି ୱିକେଟ ହରାଇ ୧୪୧ ରନ ସଂଗ୍ରହ କରି ନେଇଥିଲା। ଭାରତ ପକ୍ଷରୁ ହରମନପ୍ରୀତ କୌରଙ୍କ ୩୧ ବଲରୁ ୪୬ ରନ, ଭେଦା କ୍ରୀଷ୍ଣାମୂର୍ତ୍ତି ୩୨ ବଲରୁ ୩୫, ଏସଏସ ମାନ୍ଧାନା ୨୫ ବଲରୁ ୨୯ ରନ କରି ଭାରତକୁ ବିଜୟୀ କରାଇଥିଲେ। ଅଷ୍ଟ୍ରେଲିଆ ପକ୍ଷରୁ ମେଗମ୍ ସ୍କିହୁଟ୍ ଓ ଜେସ ଜୋନାସସେନ୍ ୨ଟି ଲେଖାଏଁ ଓ ରାନେ ଫାରେଲ୍ ଗୋଟିଏ ୱିକେଟ ନେଇଥିଲେ।

ହରମନପ୍ରୀତ କୌରଙ୍କୁ ‘ମ୍ୟାଚ ଅଫ୍ ଦି ମ୍ୟାଚ’ ପୁରସ୍କାର ପ୍ରଦାନ କରାଯାଇଥିଲା। ଆସନ୍ତା ଶୁକ୍ରବାର ଦିନ ଭାରତୀୟ ମହିଳା ଦଳ ଅଷ୍ଟ୍ରେଲିଆକୁ ମେଲବୋର୍ଣ୍ଣରେ ଭେଟିବ।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।