ମାଲେସିଆ ମାଷ୍ଟର୍ସ ସେମିରେ ସିନ୍ଧୁ ଓ ଶ୍ରୀକାନ୍ତ

ପେନଙ୍ଗ (ମାଲେସିଆ): ମାଲେସିଆ ମାଷ୍ଟର୍ସ ବ୍ୟାଡମିଣ୍ଟନରେ ଭାରତୀୟ ଖେଳାଳି ପି.ଭି ସିନ୍ଧୁ ଓ କିଦାମ୍ବି ଶ୍ରୀକାନ୍ତ ଶୁକ୍ରବାର ସେମାନଙ୍କ ନିଜ ନିଜ ବର୍ଗରେ ସେମି ଫାଇନାଲରେ ପହଞ୍ଚି ଯାଇଛନ୍ତି।

ତୃତୀୟ ସିଡର ସିନ୍ଧୁ ମହିଳା ସିଙ୍ଗଲ୍ସର ଏକ କ୍ୱାର୍ଟର ଫାଇନାଲରେ ଇଣ୍ଡୋନେସିଆର ଲିଣ୍ଡାୱେନି ଫନେତ୍ରିଙ୍କୁ ୨୧-୧୦, ୨୧-୧୦ରେ ପରାସ୍ତ କରିଛନ୍ତି। ୱାର୍ଲ୍ଡ ଚାମ୍ପିଅନସିପରେ ଦୁଇ ଥର ବ୍ରୋଞ୍ଜ୍ ପଦକ ଜିତିଥିବା ସିନ୍ଧୁ ସେମି ଫାଇନାଲରେ କୋରିଆର ଟପ୍ ସିଡ୍ ସଙ୍ଗ ଜି ହ୍ୟୁନ୍ ଅବା ଜାପାନର ୫ମ ସିଡର ସାୟକା ସାତୋଙ୍କୁ ଭେଟିବେ।

ସେହିପରି ପୁରୁଷ ବର୍ଗରେ ଶ୍ରୀକାନ୍ତ ଚୀନର ହୁଆଙ୍ଗ ଜିଆଙ୍ଗଙ୍କୁ ୨୧-୧୫, ୨୧-୧୪ରେ ହରାଇ ସେମି ଫାଇନାଲରେ ପ୍ରବେଶ କରିଛନ୍ତି। ମାତ୍ର ୩୩ ମିନିଟରେ ସେ ହୁଆଙ୍ଗଙ୍କୁ ପରାସ୍ତ କରି ଦେଇଥିଲେ। ସେ ଆସନ୍ତାକାଲି ସେମି ଫାଇନାଲରେ ମାଲେସିଆର ଇସ୍କନ୍ଦର ଜୁଲକରନୈନ ଜୈନୁଦ୍ଦିନଙ୍କୁ ଭେଟିବେ।