ଜୋହାନ୍ସବର୍ଗ: ଦକ୍ଷିଣ ଆଫ୍ରିକା ଓ ପାକିସ୍ତାନ ମଧ୍ୟରେ ମଙ୍ଗଳବାର ରାତିରେ ଶେଷ ହୋଇଥିବା ଦ୍ୱିତୀୟ ଦିନିକିଆରେ ଏକ ଲଜ୍ଜାଜନକ ଘଟଣା ଘଟିଛି। ୱିକେଟ୍ କିପିଂ କରିଥିବା ପାକ୍ ଅଧିନାୟକ ସର୍ଫରାଜ ଅହମ୍ମଦ ଦକ୍ଷିଣ ଆଫ୍ରିକା ଅଲରାଉଣ୍ଡର ଆନ୍ଦିଲେ ଫେଳୁକାଓଙ୍କ ପ୍ରତି ବର୍ଣ୍ଣବୈଷମ୍ୟବାଦୀ ଟିପ୍ପଣୀ ଦେଇଛନ୍ତି। ଫେଳୁକାଓ ଜବରଦସ୍ତ ଖେଳ ପ୍ରଦର୍ଶନ କରି ପାକିସ୍ତାନ ହାତରୁ ମ୍ୟାଚ୍ ଛଡ଼ାଇ ଆଣିଥିଲେ। ଏଥିସହ ୫ଟିକିଆ ଦିନିକିଆ ସିରିଜ୍ ଏବେ ୧-୧ରେ ବରାବର ହୋଇଯାଇଛି। କିନ୍ତୁ ଫେଳୁକାଓ ବ୍ୟାଟିଂ କରୁଥିବା ବେଳେ ୱିକେଟ୍ ପଛରେ ରହି ସର୍ଫରାଜ ତାଙ୍କୁ ଅତ୍ୟନ୍ତ ଅସଭ୍ୟ ଭାଷାରେ ଚିଡ଼ାଇବାକୁ ଚେଷ୍ଟା କରିଥିଲେ। ଷ୍ଟମ୍ପରେ ଲାଗିଥିବା ମାଇକ୍ ଦ୍ୱାରା ଏହା ରେକର୍ଡ ମଧ୍ୟ ହୋଇଛି।
ରେକର୍ଡିଂ ଅନୁଯାୟୀ, ସର୍ଫରାଜ କହୁଛନ୍ତି “ଆବେ କାଳିଆ, ଆଜି ତୋ ମା’ କୋଉଠି ବସିଛନ୍ତି? ଆଜି କ୍ରିଜରେ ତିଷ୍ଠି ରହିବାକୁ ତୁ ମା’ଙ୍କୁ କି ପ୍ରାର୍ଥନା କରିବାକୁ କହିଛୁ?”
ଏହି ସମୟରେ ମାଇକ୍ ହାୟସମ୍ୟାନ୍ ଓ ରମିଜ୍ ରାଜା କମେଣ୍ଟ୍ରୀ କରୁଥିଲେ। ମାଇକ୍ ଏକଥା ଶୁଣିବା ପରେ ଇଂରାଜୀରେ ଏହାକୁ ଟ୍ରାନସଲେଟ୍ କରିବାକୁ ରମିଜ୍ଙ୍କୁ କହିଥିଲେ। କିନ୍ତୁ ପାକିସ୍ତାନର ଏହି ଚତୁର କମେଣ୍ଟେଟର ଏପରି କରି ନଥିଲେ। ରମିଜ କହିଥିଲେ, “ ଏହାକୁ ଟ୍ରାନ୍ସଲେସନ୍ କରିବା ବହୁତ କଷ୍ଟ। ଏହା ବହୁତ ଲମ୍ବା ବାକ୍ୟ।” ଏହାପରେ ସେ ବହୁତ ଜୋରରେ ହସିଥିଲେ। ଏହାକୁ ନେଇ ବିବାଦ ସୃଷ୍ଟି ହୋଇଛି। ଆଇସିସି ସର୍ଫରାଜଙ୍କ ଏହି ବର୍ଣ୍ଣବୈଷମ୍ୟବାଦୀ ମନ୍ତବ୍ୟ ପାଇଁ ତାଙ୍କ ଉପରେ କାର୍ଯ୍ୟାନୁଷ୍ଠାନ କରିବାକୁ ବିଚାର କରୁଥିବା ଜଣାପଡ଼ିଛି।
ଦେଖନ୍ତୁ ଭିଡିଓ
https://twitter.com/twitter/statuses/1087930577871929344
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।