ଭୁବନେଶ୍ୱର: ମୋହାଲିର ପଞ୍ଜାବ କ୍ରିକେଟ୍ ଆସୋସିଏସନ୍ ଷ୍ଟାଡିୟମ୍ରେ ଚାଲିଥିବା ଓଡ଼ିଶା ବିପକ୍ଷ ରଣଜୀ ମ୍ୟାଚ୍ର ତୃତୀୟ ଦିନରେ ଦିଲ୍ଲୀ ୮ ୱିକେଟ୍ ହରାଇ ୪୯୫ ରନ୍ କରି ତା’ର ପ୍ରଥମ ପାଳି ଘୋଷଣା କରିଛି। ଆଜିର ଖେଳ ଶେଷ ସୁଦ୍ଧା ଓଡ଼ିଶା ୪ ୱିକେଟ୍ ହରାଇ ୧୦୯ ରନ୍ ସଂଗ୍ରହ କରିଛି।
ଗତକାଲିର ୩୫୧ ରନ୍ରୁ ଆଜି ଦିଲ୍ଲୀ ଖେଳ ଆରମ୍ଭ କରିଥିଲା। ଆଜି ଏକମାତ୍ର ବ୍ୟାଟ୍ସମ୍ୟାନ ଭାବେ ମାନସ ଶର୍ମା ୮୧ ରନ୍ କରି ଆଉଟ୍ ହୋଇଥିଲେ। ଗତକାଲି ୩୯ ରନ୍ରେ ଅପରାଜିତ ଥିବା ମିଲନ୍ଦ ୧୦୬ ରନ୍ର ଶତକୀୟ ପାରି ଖେଳିଥିଲେ। ଅନ୍ୟମାନଙ୍କ ମଧ୍ୟରେ ଗୌତମ ଗମ୍ଭୀର ୧୪୭ ଏବଂ ରିଷଭ ପନ୍ତ ୬୦ ରନ୍ କରି ଆଉଟ୍ ହୋଇଥିଲେ।
ଓଡ଼ିଶା ବୋଲର ଧୀରଜ ସିଂହ ୪ଟି ୱିକେଟ୍ ନେଇଥିବା ବେଳେ ସୂର୍ଯ୍ୟକାନ୍ତ ପ୍ରଧାନ ଏବଂ ଗୋବିନ୍ଦ ପୋଦ୍ଦାର ୨ଟି ଲେଖାଏଁ ୱିକେଟ୍ ଅକ୍ତିଆର କରିଥିଲେ।
ଦ୍ୱିତୀୟ ଇନିଂସ୍ରେ ଓଡ଼ିଶା ୱିକେଟ୍ ହରାଇ ୧୦୯ ରନ୍ କରିଛି। ସନ୍ଦିପ ପଟ୍ଟନାୟକ ୬ ଚୌକା ସହାୟତାରେ ୨୭ ରନ୍ କରି ଆଉଟ୍ ହୋଇଥିବା ବେଳେ ରଞ୍ଜିତ ସିଂହ ୨, ଏ. ଷଢ଼ଙ୍ଗୀ ୧୮ ଏବଂ ଶୁଭ୍ରାଂଶୁ ସେନାପତି ୨ କରି ଆଉଟ୍ ହୋଇଛନ୍ତି। ଅଧିନାୟକ ଗୋବିନ୍ଦ ପୋଦ୍ଦାର (୫୨) ଏବଂ ବିପ୍ଳବ ସାମନ୍ତରାୟ (୭) ଅପରାଜିତ ଅଛନ୍ତି।
ଦିଲ୍ଲୀ ବୋଲର ଇଶାନ୍ତ ଶର୍ମା ୨ଟି, ଏମ୍ ଶର୍ମା ଏବଂ ଭି. ଟୋକସ୍ ଗୋଟିଏ ଲେଖାଏଁ ୱିକେଟ୍ ଅକ୍ତିଆର କରିଛନ୍ତି।
ଟସ୍ ହାରି ବ୍ୟାଟିଂ ଆମନ୍ତ୍ରଣ ପାଇଥିବା ଓଡ଼ିଶା ପ୍ରଥମ ପାଳିରେ ୨୩୭ ରନ୍ କରି ଅଲଆଉଟ୍ ହୋଇଯାଇଥିଲା।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
