ଦ୍ୱିତୀୟ ଟେଷ୍ଟ: ପ୍ରଥମ ଇନିଂସରେ ଭାରତ ୩୧୬ ରନ୍‌ରେ ଅଲ୍‌ଆଉଟ୍‌, ନ୍ୟୁଜିଲାଣ୍ଡ ୧୨୮/୭

କୋଲକାତା: କୋଲକାତାର ଇଡେନ୍ ଗାର୍ଡେନ୍‌ରେ ଚାଲିଥିବା ନ୍ୟୁଜିଲାଣ୍ଡ ବିପକ୍ଷ ଦ୍ୱିତୀୟ ଟେଷ୍ଟ୍ ମ୍ୟାଚ୍‌ର ପ୍ରଥମ ଇନିଂସରେ ଭାରତ ସମସ୍ତ ୱିକେଟ୍ ହରାଇ ୩୧୬ ରନ୍ କରିଛି। ଦ୍ୱିତୀୟ ଦିନ ଶେଷ ସୁଦ୍ଧା ନ୍ୟୁଜିଲାଣ୍ଡ ଦଳ ୭ଟି ୱିକେଟ୍ ହରାଇ ୧୨୮ ରନ୍ କରିଛି।

ଗତକାଲି ମ୍ୟାଚ୍‌ର ପ୍ରଥମ ଦିନରେ ଦଳ ୭ ୱିକେଟ୍ ହରାଇ ୨୩୯ ରନ୍ କରିଥିଲା। ଦଳ ଆଜି ମାତ୍ର ୭୭ ରନ୍ ଯୋଡ଼ିବାରେ ସକ୍ଷମ ହୋଇଥିଲା। ଗତକାଲି ରିଦ୍ଧିମାନ ଶାହା ୧୪ ରନ୍ ଓ ରବୀନ୍ଦ୍ର ଜାଡେଜା କୌଣସି ରନ୍ ନ କରି କ୍ରିଜ୍‌ରେ ରହିଥିଲେ। ଆଜି ଜାଡେଜା ୧୪ ରନ୍ କରି ଆଉଟ୍ ହୋଇଯାଇଥିଲେ। ତାଙ୍କ ପରେ କ୍ରିଜ୍‌କୁ ଆସିଥିବା ଭୁବନେଶ୍ୱର କୁମାର ମାତ୍ର ୫ ରନ୍ କରି ଆଉଟ୍ ହୋଇଥିଲେ। ସେହିପରି ମହମ୍ମଦ ସାମି ମଧ୍ୟ ୧୪ ରନ୍ କରି ଆଉଟ୍ ହୋଇଯାଇଥିଲେ। ରିଦ୍ଧିମାନ ୫୪ ରନ୍ କରି ନଟ୍‌ଆଉଟ୍ ରହିଥିଲେ।

ଦଳ ପକ୍ଷରୁ ଚେତେଶ୍ୱର ପୂଜାରା ସର୍ବାଧିକ ୮୭ ରନ୍ କରିଥିବା ବେଳେ ଆଜିଙ୍କ୍ୟ ରାହାଣେ ୭୭ ରନ୍ କରିଛନ୍ତି। ବିରାଟ କୋହଲି, ମୁରଲୀ ବିଜୟ, ଶିଖର ଧାୱନ ଓ ରୋହିତ ଶର୍ମା ଗତକାଲି ଫେଲ୍ ମାରି ଥିଲେ। ସେମାନେ ଦୁଇ ଅଙ୍କ ବି ଛୁଇଁ ନ ଥିଲେ।

ଭାରତ ପକ୍ଷରୁ ଭୁବନେଶ୍ୱର କୁମାର ୫ଟି, ମହମ୍ମଦ ସାମି ଓ ରବୀନ୍ଦ୍ର ଜାଡ଼େଜା ଗୋଟିଏ ଲେଖାଏଁ ୱିକେଟ୍ ନେଇଛନ୍ତି। ନ୍ୟୁଜିଲାଣ୍ଡ ପକ୍ଷରୁ ବିଜେ ୱାଟଲିଂ ୧୧ ରନ୍ ଏବଂ ଜିତେନ ପଟେଲ ୫ ରନ୍‌ କରି ଅପରାଜିତ ଅଛନ୍ତି।