ନୂଆଦିଲ୍ଲୀ: ଆଗାମୀ ଆଇପିଏଲ୍ ପାଇଁ ଖେଳାଳି ନିଲାମ ପ୍ରକ୍ରିୟା ଖୁବ୍ଶୀଘ୍ର ହେବ। ଏଥିପାଇଁ ପ୍ରାଞ୍ଚାଇଜିମାନେ ସବୁ ପ୍ରକାରର ପ୍ରସ୍ତୁତି ଶେଷ କରିଛନ୍ତି। ବିଶ୍ୱର ବଛାବଛା ଟି-୨୦ ଖେଳାଳିଙ୍କୁ କିଣିବା ପାଇଁ ସମସ୍ତେ ସୁଯୋଗ ଅପେକ୍ଷାରେ ରହିଛନ୍ତି। କିନ୍ତୁ ବିଶ୍ୱର ୩ ଜଣ ଅନ୍ତର୍ଜାତୀୟ ଖେଳାଳିଙ୍କୁ ନିଜ ଦଳରେ ସାମିଲ କରିବା ପାଇଁ ୨୦୧୯ ଆଇପିଏଲ୍ ନିଲାମରେ ଜୋରଦାର ଲଢ଼େଇ ହେବ।
ଆଇପିଏଲ୍ ପରେ ପରେ ବିଶ୍ୱକପ୍ ଥିବାରୁ କିଛି ଦେଶର କ୍ରିକେଟ୍ ବୋର୍ଡ ନିଜ ଦେଶର ବଛାବଛା ଖେଳାଳିଙ୍କୁ ଆଇପିଏଲ୍ ଖେଳିବାକୁ ଛାଡ଼ି ନ ପାରନ୍ତି। ତେବେ ୱେଷ୍ଟଇଣ୍ଡିଜର ବିସ୍ଫୋରକ ବ୍ୟାଟସ୍ମ୍ୟାନ୍ ଶିମରନ୍ ହେଟମେୟର, ଇଂଲଣ୍ଡର ଅଲରାଉଣ୍ଡର ସ୍ୟାମ କରାନ ଓ ଅଷ୍ଟ୍ରେଲିଆର ମ୍ୟାକ୍ସୱେଲଙ୍କୁ କିଣିବା ପାଇଁ ପ୍ରାଞ୍ଚାଇଜିଙ୍କ ମଧ୍ୟରେ ଲଢ଼େଇ ହେବା ସୁନିଶ୍ଚିତ।
ଆସିବା ଜାଣନ୍ତୁ କାହିଁକି ଏମାନଙ୍କୁ ନେବାକୁ ଆଇପିଏଲ୍ ଦଳଗୁଡ଼ିକ ଏତେ ଆଗ୍ରହୀ ?
୧: ଶିମରନ୍ ହେଟମେୟର: ନିକଟରେ ଭାରତ ବିପକ୍ଷ ସିରିଜ୍ରେ ହେଟମେୟର ତାଙ୍କ ବ୍ୟାଟିଂ ଦ୍ୱାରା ସମସ୍ତଙ୍କୁ ପ୍ରଭାବିତ କରିଛନ୍ତି। ବିଶେଷ କରି ଭାରତୀୟ ପିଚ୍ରେ ସେ ଯେଉଁଭଳି ସ୍ପିନ୍ ବୋଲରଙ୍କୁ ପ୍ରହାର କରିଥିଲେ, ତାହା କ୍ରିକେଟ୍ ପଣ୍ଡିତମାନଙ୍କୁ ଆଶ୍ଚର୍ଯ୍ୟ କରିଥିଲା। ସେ ଉଭୟ ମଧ୍ୟକ୍ରମ ଓ ଶେଷ ଭାଗରେ ଦ୍ରୁତ ଗତିରେ ରନ୍ ସଂଗ୍ରହ କରିବାର କ୍ଷମତା ରଖିଛନ୍ତି।
୨: ସ୍ୟାମ କରାନ୍: ଭାରତର ଇଂଲଣ୍ଡ ଗସ୍ତରେ ଯାଇଥିବା ବେଳେ ଯଦି କେହି ଦଳକୁ ଅଡ଼ୁଆରେ ପକାଇଥିଲା, ସେ ହେଉଛନ୍ତି ଇଲିଂଶ ଦଳର ଅଲରାଉଣ୍ଡର ସ୍ୟାମ କରାନ। ସେ ଭାରତ ବିପକ୍ଷରେ ଉଭୟ ବ୍ୟାଟ୍ ଓ ବଲ୍ରେ ଜବରଦସ୍ତ ପ୍ରଦର୍ଶନ କରିଥିବାରୁ, ତାଙ୍କୁ ମ୍ୟାନ୍ ଅଫ୍ ଦି ସିରିଜ୍ ଭାବେ ପୁରସ୍କୃତ କରାଯାଇଥିଲା। ସେ ବ୍ୟାଟିଂରେ ଇଂଲଣ୍ଡକୁ ବିପର୍ଯ୍ୟୟରୁ ଉଦ୍ଧାର କରିବା ସହ ବଲ୍ରେ ମଧ୍ୟ ଦରକାର ବେଳେ ଦଳକୁ ୱିକେଟ ଆଣିଦେଇ ଥିଲେ।
୩: ଗ୍ଲେନ୍ ମ୍ୟାକ୍ସୱେଲ୍: ଗତବର୍ଷ ଡେୟାର ଡେଭିଲ୍ସ ପକ୍ଷରୁ ଆଇପିଏଲ୍ ଖେଳୁଥିବା ମ୍ୟାକ୍ସୱେଲଙ୍କୁ ଏଥର ନିଲାମ ପ୍ରକ୍ରିୟାରେ ସାମିଲ ହେବାକୁ ମୁକ୍ତ କରିଦେଇଛି। କିନ୍ତୁ ଏବେ ମ୍ୟାକ୍ସୱେଲ୍ ଜବରଦସ୍ତ ଫର୍ମରେ ରହିଛନ୍ତି। ଭାରତ ବିପକ୍ଷ ଟି-୨୦ରେ ମଧ୍ୟ ଏକଥା ସେ ପ୍ରମାଣ କରି ଦେଖାଇଛନ୍ତି। ତେଣୁ ଏପରି ସ୍ଥିତିରେ ତାଙ୍କୁ କିଣିବାକୁ ନିଶ୍ଚିତ ଭାବେ ପ୍ରାଞ୍ଚାଇଜିମାନଙ୍କ ମଧ୍ୟରେ ଲଢ଼େଇ ହବ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।