ଅନ୍ତର୍ଜାତୀୟ ମ୍ୟାଚରେ ଇତିହାସ: ହେଲମେଟ୍ ପିନ୍ଧି ଅମ୍ପାୟରିଂ କଲେ ୱାର୍ଡ

କାନବେରା: କାନବେରାରେ ଭାରତ-ଅଷ୍ଟ୍ରେଲିଆ ଚତୁର୍ଥ ଦିନିକିଆରେ ମ୍ୟାଚରେ ସୃଷ୍ଟି ହୋଇଛି ଏକ ଇତିହାସ। ଅନ୍ତର୍ଜାତୀୟ ମ୍ୟାଚରେ ପ୍ରଥମ ଥର ପାଇଁ ହେଲମେଟ୍ ପିନ୍ଧି ପଡିଆକୁ ଓହ୍ଲାଇଥିଲେ ଅଷ୍ଟ୍ରେଲିଆର ଅମ୍ପାୟର ଜନ୍ ଡେଭିଡ ୱାର୍ଡ। ଏହାକୁ ନେଇ ଷ୍ଟାଡିୟମରେ ବେଶ୍ କିଛି ସମୟ ଧରି ଦର୍ଶକଙ୍କ ମଧ୍ୟରେ ହାସ୍ୟରୋଳ ଦେଖିବାକୁ ମିଳିଥିଲା।

ଏହି ମ୍ୟାଚରେ ହେଲମେଟ୍ ପିନ୍ଧିବା ନେଇ ୱାର୍ଡ ପୂର୍ବରୁ ସୂଚନା ଦେଇଥିଲେ। ଏହା ତାଙ୍କର ଷଷ୍ଠ ଅନ୍ତର୍ଜାତୀୟ ମ୍ୟାଚ୍।

ୱାର୍ଡ ହେଲମେଟ୍ ପିନ୍ଧି ଅମ୍ପାୟରିଂ କରିବା ପଛରେ ବିଶେଷ କାରଣ ବି ରହିଛି। ଗତବର୍ଷ ଭାରତରେ ଘରୋଇ ରଣଜୀ ଟ୍ରଫିର ଏକ ମ୍ୟାଚରେ ଅମ୍ପାୟରିଂ କରିବା ବେଳେ  ୫୩ ବର୍ଷିୟ ୱାର୍ଡଙ୍କ ମୁଣ୍ଡରେ ବଲ୍ ବାଜିଥିଲା।

ସେ ଆହତ ହୋଇ ହସ୍ପପିଟାଲରେ ଭର୍ତ୍ତି ହୋଇଥିଲେ। ସେ ଚଳିତ ମାସରେ ଅଷ୍ଟ୍ରେଲିଆର ବିଗ ବେସରେ ଅମ୍ପାୟରିଂ କରିଥିଲେ। ସେଥିରେ ମଧ୍ୟ  ସେ ହେଲମେଟ୍ ପିନ୍ଧିଥିଲେ। ସେ ୬ଟି ଟି -୨୦ ମ୍ୟାଚରେ ଅମ୍ପାୟରିଂ କରି ସାରିଛନ୍ତି।