ସ୍ୱଦେଶ ଫେରିଗଲେ ୱିଲିୟମସନ୍, ହାଇଦ୍ରାବାଦ ନେତୃତ୍ୱ ନେବେ ଭୁବି

ଚେନ୍ନାଇ: ଚେନ୍ନାଇର ଏମ୍ ଚିଦାମ୍ବରମ୍ ଷ୍ଟାଡିୟମରେ ମଙ୍ଗଳବାର ଚେନ୍ନାଇ ସୁପର କିଙ୍ଗସ୍ ଓ ସନରାଇଜର୍ସ ହାଇଦ୍ରାବାଦ ମଧ୍ୟରେ ଆଇପିଏଲର ୪୧ତମ ମ୍ୟାଚ୍ ଖେଳାଯିବ। କିନ୍ତୁ ଏହା ପୂର୍ବରୁ ସନରାଇଜର୍ସ ଟିମକୁ ବଡ଼ ଝଟକା ଲାଗିଛି।

ଟିମ ଅଧିନାୟକ କେନ୍ ୱିଲିୟମସନ୍ ବ୍ୟକ୍ତିଗତ କାରଣରୁ ଅଚାନକ୍ ସ୍ୱଦେଶ ଫେରିଯାଇଛନ୍ତି, ଯେଉଁ କାରଣରୁ ଆଜି ମ୍ୟାଚରେ ଭୁବନେଶ୍ୱର କୁମାର ହାଇଦ୍ରାବାଦର ନେତୃତ୍ୱ ନେବେ। ତେବେ ଆସନ୍ତା ୨୭ ତାରିଖରେ ରାଜସ୍ଥାନ ରୟାଲ୍ସ ବିପକ୍ଷ ମ୍ୟାଚ୍ ବେଳକୁ ୱିଲିୟମସନ୍ ଟିମ୍ ସହ ଯୋଗଦେଇ ପାରନ୍ତି। ୱିଲିୟମସନଙ୍କ ପାଇଁ ଚଳିତ ସିଜନ୍ ସେତେଟା ଭଲ ରହିନାହିଁ।

ସିଜନ୍ ଆରମ୍ଭରୁ ୱିଲିୟମସନ୍ ଆହତ ସମସ୍ୟାରେ ଥିଲେ ଏବଂ ଏହି କାରଣରୁ ସେ ପ୍ରାରମ୍ଭିକ ମ୍ୟାଚ୍ ଖେଳିପାରିନଥିଲେ। କିନ୍ତୁ ଏବେ ଫିଟ୍ ହେଲା ବେଳକୁ ୱିଲିୟମସନ୍ ସ୍ୱଦେଶ ଫେରିଯାଇଛନ୍ତି। ଚଳିତ ସିଜନରେ ହାଇଦ୍ରାବାଦର ପ୍ରଦର୍ଶନ ସେତେଟା ଆଶାନୁରୂପ ରହିନାହିଁ। ଟିମ୍ ଏପର୍ଯ୍ୟନ୍ତ ୯ ମ୍ୟାଚରୁ ୫ ମ୍ୟାଚ୍ ଜିତି ପଏଣ୍ଟ ଟେବୁଲର ଚତୁର୍ଥ ସ୍ଥାନରେ ରହିଛି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।