ଭୁବନେଶ୍ୱର: ସାରା ଦେଶରେ ଡାଲି ଦର ବୃଦ୍ଧି ଚିନ୍ତାର କାରଣ ପାଲଟିଛି । ଫଳରେ ଏସେନସିଆଲ କମୋଡିଟଇ ଆକ୍ଟ ଅନୁସାରେ ସାରା ଦେଶରେ ଡାଲି ଗୋଦାମଗୁଡିକ ଉପରେ ଚଢାଉ ଚାଲିଛି । ଆଜି ରାଜ୍ୟର ବିଭିନ୍ନ ସ୍ଥାନରେ ମଧ୍ୟ ଚଢାଉ କରାଯାଇଛି । ଭୁବନେଶ୍ୱର ସମେତ କଟକ, ବାଲେଶ୍ୱର, ସମ୍ବଲପୁର, ରାୟଗଡା ଓ ପୁରୀ ଆଦି ଜିଲ୍ଲାର ୧୦ରୁ ଅଧିକ ସ୍ଥାନରେ ଯୋଗାଣ ବିଭାଗ ଓ ସ୍ଥାନୀୟ ପ୍ରଶାସନ ପକ୍ଷରୁ ଚଢାଉ କରାଯାଇ ବ୍ୟାପକ ପରିମାଣର ଡାଲି ଜବତ କରାଯାଇଛି ।
ଭୁବନେଶ୍ୱରର ଡୁମୁଡୁମା ସ୍ଥିତ ଫେଜ୍-୧ ପ୍ଲଟ ନମ୍ୱର ୨୭୩ରେ ଜଣେ ଅବସରପ୍ରାପ୍ତ ଶିକ୍ଷକଙ୍କ ଘରେ ଚଢ଼ାଉ କରି ଯୋଗାଣ ବିଭାଗ ପକ୍ଷରୁ ୧୭୦ ବସ୍ତା ଡ଼ାଲି ଜବତ କରାଯାଇଛି। ଏଥିରେ ୮୦ ବସ୍ତା ହରଡ ଓ ୯୦ ବସ୍ତା ମସୁର ଡ଼ାଲି ରହିଛି। ଅବସରପ୍ରାପ୍ତ ଶିକ୍ଷକ ଜଣଙ୍କ କାହିଁକି ଏତେ ପରିମାଣ ଡାଲି ମହଜୁଦ ରଖିଥିଲେ ତାହା ଏବେ ପ୍ରଶ୍ନବାଚୀ ସୃଷ୍ଟି କରୁଛି । କଳାବଜାର କରିବା ଉଦ୍ଦେଶ୍ୟରେ ଏତେ ପରିମାଣର ଡାଲି ଗଚ୍ଛିତ କରି ରଖାଯାଇଥିବା ଅଭିଯୋଗ ହୋଇଛି । ତେବେ କଳାବଜାର ନୁହେଁ ବ୍ୟବସାୟ ତାଙ୍କ ପୁଅ ଏହି ଡାଲି ରଖିଥିବା ଅବସରପ୍ରାପ୍ତ ଶିକ୍ଷକ କହିଛନ୍ତି ।
ବାଲେଶ୍ୱର ଜିଲ୍ଲାରେ ଆଜି ୨ଟି ସ୍ଥାନ ଶୁଭଚରଣ ସୀତାରାମ ଓ ରାଧାକୃଷ୍ଣ ଡାଲି ଗୋଦାମରେ ଯୋଗାଣ ବିଭାଗ ପକ୍ଷରୁ ଚଢାଉ କରାଯାଇଛି । ମୋତିଗଞ୍ଜ ଶୁଭଚରଣ ସୀତାରାମ ଗୋଦାମରେ ମାଜିଷ୍ଟ୍ରେଟଙ୍କ ଉପସ୍ଥିତିରେ ଏକ ୬ଜଣିଆ ଟିମ୍ ଚଢାଉ କରିଛନ୍ତି । ଯାଞ୍ଚ ବେଳେ ଗୋଦାମରେ ୪୫୬ କୁଇଣ୍ଡାଲ ମୁଗ, ୬୮୧ କୁଇଣ୍ଟାଲ ହରଡ଼, ୩ଶହ କୁଇଣ୍ଟାଲ ମସୁର, ୯୬୦ କୁଇଣ୍ଟାଲ ବିରି ଓ ୬୩୧ କୁଇଣ୍ଟାଲ୍ ମଟର ଡାଲି ରହିଥିବା ସୂଚନା ମିଳିଛି। ଗୋଦାମର ରେକର୍ଡ ଯାଞ୍ଚ ଚାଲିଛି। ସେହିପରି ରାଧାକୃଷ୍ଣ ଗୋଦାମରେ ମଧ୍ୟ ଯୋଗାଣ ବିଭାଗ ପକ୍ଷରୁ ଚଢାଉ କରାଯାଇଛି ।
ସମ୍ବଲପୁର ସହରରେ ଯୋଗାଣ ବିଭାଗ ଓ ପ୍ରଶାସନ ପକ୍ଷରୁ ବିଭିନ୍ନ ଡାଲି ଗୋଦାମ ଉପରେ ମିଳିତ ଚଢାଉ କରାଯାଇଛି । ସହରର କ୍ଷେତରାଜପୁର ସ୍ଥିତ ଡାଲି ଗୋଦାମ ସମେତ ଅନ୍ୟ ସ୍ଥାନରେ ଥିବା ଗୋଦାମଗୁଡ଼ିକ ଉପରେ ଏହି ଚଢାଉ କରାଯାଇଛି। ଏହାସହ ୫ଟି ଗୋଦାମକୁ ସିଲ୍ କରାଯାଇଛି। ଆସନ୍ତାକାଲି ଏହାକୁ ଯାଞ୍ଚ କରାଯିବ ।
ରାୟଗଡା ଜିଲ୍ଲାରେ ମଧ୍ୟ ଯୋଗାଣ ବିଭାଗ ପକ୍ଷରୁ ଚଢାଉ କରାଯାଇଛି । ବିଭାଗ ପକ୍ଷରୁ କିସାନ ଫୁଡ ପ୍ରୋସେସିଂ ଡାଲି ମିଲ ଉପରେ ଏହି ଚଡାଉ କରାଯାଇଥିଲା । ଚଢାଉ ବେଳେ ବେଆଇନ ଭାବେ ଗଚ୍ଛିତ ଥିବା ୨୧୫ କୁଇଣ୍ଟାଲ ଡାଲି ଜବତ କରାଯାଇଛି। କଟକ ଜଗତପୁର ଅଞ୍ଚଳରେ ଥିବା ଦେବୀ ଭଣ୍ଡାର ଓ ଏମଡି ଫ।ରୁକ୍ ଆଣ୍ଡ ସନ୍ସ ଉପରେ ଚଢ଼ାଉ କରି ଡାଲି ଜବତ କରାଯାଇଛି । ପୁରୀର ଚନ୍ଦନପୁର ଜେ.କେ. ସାହୁ ଗୋଦାମ ଉପରେ ଯୋଗାଣ ବିଭାଗର ଚଢାଉ କରାଯାଇଛି । ଗୋଦାମରେ ବେଆଇନ ଭାବେ ଗଚ୍ଛିତ ଥିବା ୧୭୬ କୁଇଣ୍ଟାଲ ଡାଲି ଜବତ କରାଯାଇଛି।
ଖାଦ୍ୟ ଓ ଯୋଗାଣ ବିଭାଗ ମନ୍ତ୍ରୀ ସଞ୍ଜୟ ଦାସବର୍ମା କହିଛନ୍ତି ରାଜ୍ୟରେ ଡାଲିର ଅଭାବ ନ ଥିଲେ ମଧ୍ୟ ବେଆଇନ୍ ଭାବେ ମହଜୁଦକାରୀଙ୍କ ଉପରେ ଚଢ଼ାଉ କରାଯାଉଛି । ୧୪ଟି ଜିଲ୍ଲାରେ ଗୋଦାମଗୁଡିକର ଯାଞ୍ଚ କରାଯାଉଛି । ଜିଲ୍ଲା ପ୍ରଶାସନ ଓ ଯୋଗାଣ ବିଭାଗକୁ ଯାଞ୍ଚ କରି ବେଆଇନ ଭାବେ ଗଚ୍ଛିତ ଥିବା ଡାଲି ବାହାର କରିବକୁ ନିର୍ଦ୍ଦେଶ ଦିଆଯାଇଥିବା ଯୋଗାଣ ମନ୍ତ୍ରୀ ଦାସବର୍ମା କହିଛନ୍ତି । ସେହିପରି ବର୍ତ୍ତମାନ ଡାଲି ବଜାରରେ ଆବଶ୍ୟକ ପରିମାଣର ମହଜୁଦ୍ ଅଛି ବୋଲି ବ୍ୟବସାୟୀ ସଂଘ ପକ୍ଷରୁ କୁହାଯାଇଛି । ହରଡ଼ ଡାଲି କିଲୋ ପିଛା ୧୬୦ରୁ ୧୭୦ ଟଙ୍କ।, ମୁଗ ୧୦୯ରୁ ୧୧୫ଟଙ୍କ।, ବୁଟ୍ ୭୨ରୁ ୭୫ ଟଙ୍କ। ଓ ମସୁର ଡାଲିର ଦର ୭୫ ଟଙ୍କ।ରୁ ୮୫ ଟଙ୍କ। ମଧ୍ୟରେ ରହିଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।