ଭାରି ପଡ଼ିଲା କର୍ତ୍ତବ୍ୟରେ ଅବହେଳା: ପାଟପୁର ବାଳିକା ବିଦ୍ୟାଳୟର ପ୍ରଧାନଶିକ୍ଷକଙ୍କ ସମେତ ୨ ନିଲମ୍ବିତ

ବାରିପଦା (ଓଡ଼ିଶା ରିପୋର୍ଟର): ପାଟପୁର ବାଳିକା ବିଦ୍ୟାଳୟର ଛାତ୍ରୀ ୧୫ କିମି ଚାଲିଚାଲି ଜିଲ୍ଲାପାଳଙ୍କୁ ଭେଟିବାକୁ ଯିବା ଘଟଣାରେ ୨ ଜଣ ଶିକ୍ଷକ ନିଲମ୍ବିତ ହୋଇଛନ୍ତି। ଜିଲ୍ଲାପାଳ ସ୍କୁଲକୁ ଯାଇ ପିଲାମାନଙ୍କ ସମସ୍ୟା ଶୁଣିବା ସହ ଘଟଣାର ସତ୍ୟାସତ୍ୟ ଯାଞ୍ଚ କରିବା ପରେ କର୍ତ୍ତବ୍ୟରେ ଅବହେଳା କାରଣରୁ ପ୍ରଧାନଶିକ୍ଷକ ରାଜୀବ ମହାନ୍ତ ଏବଂ ସହକାରୀ ଶିକ୍ଷକ ସୁଶାନ୍ତ ଦାସଙ୍କୁ ନିଲମ୍ବିତ କରିଛନ୍ତି।

ମୋରଡ଼ା ବ୍ଲକର ପାଟପୁର ବାଳିକା ବିଦ୍ୟାଳୟର ଶତାଧିକ ଛାତ୍ରୀ ଆଜି ସକାଳୁ ଛାତ୍ରୀନିବାସରୁ ଜିଲ୍ଲାପାଳଙ୍କ କାର୍ଯ୍ୟାଳୟକୁ ବାହାରି ପଡିଥିଲେ। ମନ ସ୍ଥିର କରିସାରିଥିଲେ ଜିଲ୍ଲାପାଳଙ୍କୁ ଭେଟି ସେମାନଙ୍କ ସମସ୍ୟା ଜଣାଇବେ। ଖବର ପାଇ ବ୍ଲକ୍ ମଙ୍ଗଳ ସମ୍ପ୍ରସାରଣ ଅଧିକାରୀ ପିଲାମାନଙ୍କୁ ଅଧାବାଟରେ ଅଟକାଇ ବୁଝାଇ ଥିଲେ, ହେଲେ କିଛି ଲାଭ ହୋଇ ନଥିଲା। ପିଲାମାନେ ନିଜ ଜିଦ୍‌ରେ ଅଟଳ ରହିଥିଲେ। ଜିଲ୍ଲା ମଙ୍ଗଳ ଅଧିକାରୀଙ୍କ କୌଣସି କଥା ନଶୁଣି ପୁଣି ଜିଲ୍ଲାପାଳଙ୍କ କାର୍ଯ୍ୟାଳୟକୁ ଅଗ୍ରସର ହୋଇଥିଲେ। ୧୫ କିଲୋମିଟର ବାଟ ଚାଲି ଚାଲିଯିବା ପରେ ବିଧାୟକ ଭାଦବ ହାଁସଦା ଓ ପୂର୍ବତନ ମନ୍ତ୍ରୀ ସୁଦାମ ମାରାଣ୍ଡି ସେମାନଙ୍କୁ ବୁଝାଶୁଝା କରି ଏକ ବସ୍‌ରେ ପାଟପୁର ସ୍କୁଲକୁ ଫେରାଇ ଆଣିଥିଲେ।

ଛାତ୍ରୀମାନେ ଅଭିଯୋଗ କରିଛନ୍ତି, ସ୍କୁଲର ଭାରପ୍ରାପ୍ତ ପ୍ରଧାନଶିକ୍ଷକ ଓ ଜଣେ ସହକାରୀ ଶିକ୍ଷକ ସେମାନଙ୍କୁ ମାନସିକ ନିର୍ଯାତନା ଦେଇଛନ୍ତି। ଏପରିକି ହଷ୍ଟେଲ୍‌ରେ ଭେଟିବାକୁ ଆସୁଥିବା ସେମାନଙ୍କ ଅଭିଭାବକଙ୍କୁ ଦୁର୍ବ୍ୟବହାର ପ୍ରଦର୍ଶନ କରାଯାଉଛି।

ଘଟଣା ସମ୍ପର୍କରେ ଜାଣିବା ପରେ ଜିଲ୍ଲାପାଳ ସ୍କୁଲକୁ ଯାଇ ଘଟଣା ସମ୍ପର୍କରେ ଅନୁଧ୍ୟାନ ଆରମ୍ଭ କରିଥିଲେ। ଜିଲ୍ଲାପାଳ ଛାତ୍ରୀଙ୍କ ସହ ରୁଦ୍ଧଦ୍ୱାର ବୈଠକ କରିଥିଲେ। ଏହି ସମୟରେ ସ୍ଥାନୀୟ ଲୋକେ ଉତ୍ତ୍ୟକ୍ତ ହୋଇ ସ୍କୁଲ ଗେଟ୍‌ରେ ତାଲା ପକାଇ ଦେବାରୁ ସ୍ଥିତି ଉତ୍ତେଜନାପୂର୍ଣ୍ଣ ହୋଇପଡ଼ିଥିଲା। ପୋଲିସ ପହଞ୍ଚି ସ୍ଥିତିକୁ ନିୟନ୍ତ୍ରଣକୁ ନେଇଥିଲା। ଛାତ୍ରୀଙ୍କ ଅଭିଯୋଗ ଆଧାରରେ ଭାରପ୍ରାପ୍ତ ପ୍ରଧାନଶିକ୍ଷକ ଓ ସହକାରୀ ଶିକ୍ଷକଙ୍କୁ ଜିଲ୍ଲାପାଳ ନିଲମ୍ବନ କରିଛନ୍ତି।

ଅଭିଯୋଗ ସଂପୂର୍ଣ୍ଣ ମିଥ୍ୟା ବୋଲି ଉଭୟ ଶିକ୍ଷକ କହିଛନ୍ତି।

ପିଲାମାନଙ୍କ ପାଠ ପଢା ପାଇଁ ସରକାର ବିଭିନ୍ନ ଯୋଜନା କରୁଛନ୍ତି। ବହୁ ସୁବିଧା ଯୋଗାଇ ଦିଆଯାଉଛି। ଏଥିପାଇଁ କେନ୍ଦ୍ର ଓ ରାଜ୍ୟ ସରକାର ପ୍ରଚୁର ଅର୍ଥ ମଧ୍ୟ ଖର୍ଚ୍ଚ କରୁଛନ୍ତି। ହେଲେ କିଛି ବିଦ୍ୟାଳୟରେ ପିଲାମାନଙ୍କୁ ଏହି ସୁବିଧା ମିଳୁନାହିଁ। ବିଶେଷ କରି ସ୍କୁଲ ହଷ୍ଟେଲରେ ରହି ପଢୁଥିବା ପିଲାମାନେ ନାହିଁ ନଥିବା ସମସ୍ୟାର ସମ୍ମୁଖୀନ ହେଉଥିବା ବିଭିନ୍ନ ସମସ୍ୟରେ ଅଭିଯୋଗ ହେଉଛି।