ତେଲକୋଇ ବିଧାୟକ ବେଦବ୍ୟାସ ନାୟକଙ୍କୁ ଆକ୍ରମଣ ଘଟଣାରେ ୭ ଗିରଫ

7-arrested

କେନ୍ଦୁଝର: ଦଳୀୟ କର୍ମୀ ସମ୍ମିଳନୀରେ ତେଲକୋଇ ବିଧାୟକ ବେଦବ୍ୟାସ ନାୟକଙ୍କ ଉପରେ ଆକ୍ରମଣ ଘଟଣାରେ ହରିଚନ୍ଦନପୁର ପୋଲିସ୍ ୭ ଜଣଙ୍କୁ ଗିରଫ କରିଛି। ଗିରଫ ଅଭିଯୁକ୍ତମାନେ ହେଲେ ସୁରେନ୍ଦ୍ର ସାହୁ, ପଞ୍ଚାନନ ସାହୁ, ତାପସ ନାଏକ, ତପନ ରଥ, ବିଷ୍ଣୁପ୍ରସାଦ ବିଶ୍ୱାଳ, ପ୍ରକାଶ ବିଶ୍ୱାଳ ଓ ରଣଜିତ ସାହୁ।

ଏହି ଘଟଣାରେ ମୋଟ ୧୨ ଜଣଙ୍କ ନାଁରେ ଥାନାରେ ଏତଲା ଦିଆଯାଇଥିଲା। ଘଟଗାଁ ଏସ୍‌ଡିପିଓଙ୍କ ନେତୃତ୍ୱରେ ଗଠିତ ଏକ ଟିମ୍ ବିଭିନ୍ନ ସ୍ଥାନରେ ଚଢ଼ାଉ କରି ୭ ଜଣଙ୍କୁ ଗିରଫ କରିଥିବା ବେଳେ ମୁଖ୍ୟ ଅଭିଯୁକ୍ତଙ୍କ ସମେତ ୫ ଜଣ ଏବେବି ଫେରାର ଅଛନ୍ତି।

ଏହି ଘଟଣାରେ କେନ୍ଦୁଝର ଜିଲ୍ଲା ବିଜେଡି ସଭାପତି ୩ ଜଣ କର୍ମୀଙ୍କୁ ନିଲମ୍ବନ କରିଛନ୍ତି। ସେମାନେ ହେଲେ ବିଷ୍ଣୁ ପ୍ରସାଦ ବିଶ୍ୱାଳ, ପଞ୍ଚାନନ ସାହୁ ଓ ବିକାଶ ଭିତିରିଆ। ଏ ତିନି ଜଣଙ୍କ ମଧ୍ୟରୁ ପଞ୍ଚାନନ ଓ ବିଷ୍ଣୁପ୍ରସାଦ ଗିରଫ ହୋଇଛନ୍ତି।

ଗତ ୨୮ ତାରିଖ ଦିନ କେନ୍ଦୁଝର ଜିଲ୍ଲା ଘଟଗାଁ ବ୍ଲକ ଗୁଣ୍ଡିଚାଘାଗିରେ ବିଜେଡି କର୍ମୀ ସମ୍ମିଳନୀରେ ବେଦବ୍ୟାସ ନାୟକଙ୍କ ଉପରେ ଆକ୍ରମଣ ହୋଇଥିଲା। ସେ ଗୁରୁତର ଭାବେ ଆହତ ହୋଇଥିଲେ। ତାଙ୍କ ମୁଣ୍ଡ ଓ ପିଠିରେ ଗଭୀର କ୍ଷତ ହୋଇଥିଲା। ତାଙ୍କୁ ପ୍ରଥମେ ହରିଚନ୍ଦନପୁର ଡାକ୍ତରଖାନାରେ ଭର୍ତ୍ତି କରାଯାଇଥିଲା। ପରେ ତାଙ୍କୁ କଟକ ବଡ଼ ମେଡିକାଲ୍‌ରେ ଭର୍ତ୍ତି କରାଯାଇଥିଲା।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।