ବିଜେପିରେ ଯୋଗ ଦେଲେ ଖଣ୍ଡପଡ଼ାର ପୂର୍ବତନ ବିଧାୟକ ସିଦ୍ଧାର୍ଥ ଶେଖର ସିଂ

ଭୁବନେଶ୍ୱର: ବିଜେଡିରୁ ଇସ୍ତଫା ଦେଇଥିବା ଖଣ୍ଡପଡ଼ାର ପୂର୍ବତନ ବିଧାୟକ ସିଦ୍ଧାର୍ଥ ଶେଖର ସିଂ ଶନିବାର ବିଜେପିରେ ଯୋଗ ଦେଇଛନ୍ତି। କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏବଂ ରାଜ୍ୟ ବିଜେପି ସଭାପତି ବସନ୍ତ ପଣ୍ଡାଙ୍କ ଉପସ୍ଥିତିରେ ସେ ବିଜେପିରେ ଯୋଗ ଦେଇଛନ୍ତି।

ଜାନୁଆରୀ ୩ ତାରିଖରେ ସଦ୍ଧାର୍ଥ ବିଜେଡିରୁ ଇସ୍ତଫା ଦେଇଥିଲେ। ସେ ତାଙ୍କର ଇସ୍ତଫା ପତ୍ର ଦଳୀୟ ମୁଖ୍ୟ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିକଟକୁ ପଠାଇଥିଲେ। ଦଳରେ ତାଙ୍କୁ ଗୁରୁତ୍ୱ ଦିଆଯାଉ ନ ଥିବାରୁ ସେ ଦଳ ଛାଡ଼ି ଥିବା କହିଥିଲେ।

୨୦୦୯ରୁ ୨୦୧୪ ପର୍ଯ୍ୟନ୍ତ ସିଦ୍ଧାର୍ଥ ଖଣ୍ଡପଡ଼ା ବିଧାୟକ ଥିଲେ। ୨୦୧୪ ବିଧାନସଭା ନିର୍ବାଚନରେ ବିଜେଡି ତାଙ୍କୁ ଟିକେଟ୍ ଦେଇ ନ ଥିଲା। ୨୦୧୪ରେ ବିଜେଡି ସିଦ୍ଧାର୍ଥଙ୍କ ବଦଳରେ ଅନୁଭବ ପଟ୍ଟନାୟକଙ୍କୁ ଦଳ ଖଣ୍ଡପଡ଼ାରେ ବିଧାୟକ ପ୍ରାର୍ଥୀ କରିଥିଲା ଏବଂ ସେ ବିଜୟୀ ମଧ୍ୟ ହୋଇଥିଲେ।

ବିଜେଡିରୁ ଇସ୍ତଫା ଦେଲାବେଳେ ସିଦ୍ଧାର୍ଥ କହିଥିଲେ, ‘୨୦୧୪ରେ ଦଳ ମତେ ଟିକେଟ୍ ଦେଇ ନ ଥିଲା। ତଥାପି ମୁଁ ଦଳ ସପକ୍ଷରେ ରହିଥିଲି। ନିର୍ବାଚନରେ ପ୍ରାର୍ଥୀ ହୋଇ ନ ଥିଲି କି ଦଳ ବିରୋଧୀ କୌଣସି କାର୍ଯ୍ୟ କରି ନ ଥିଲି। ତା’ପରେ କନ୍ଧମାଳ ନିର୍ବାଚନ ହୋଇଥିଲା। ସେତେବେଳେ ମୋତେ ରାଇକିଆ ଯାଇ ନିର୍ବାଚନ କଥା ବୁଝିବାକୁ ଦାୟିତ୍ୱ ଦିଆଯାଇଥିଲା। ମୁଁ ରାଇକିଆ ଯାଇଥିଲି ଓ ଦାୟିତ୍ୱ ତୁଲାଇ ଥିଲି। କିନ୍ତୁ କନ୍ଧମାଳ ନିର୍ବାଚନ ପରେ ମୋତେ ଦଳର ଅନ୍ୟ କୌଣସି କାର୍ଯ୍ୟକ୍ରମକୁ ଡକା ଗଲା ନାହିଁ। ନିର୍ବାଚନ ମଣ୍ଡଳୀ ସ୍ତରୀୟ ହେଉ ଅବା ଜିଲ୍ଲା ସ୍ତାରୀୟ ହେଉ- କୌଣସି ଦଳୀୟ କାର୍ଯ୍ୟକ୍ରମକୁ ମୋତେ ଡକାଗଲା ନାହିଁ। ଦଳୀୟ ସଭାସମିତିରେ ଅଂଶଗ୍ରହଣ କରିବାକୁ କୁହାଗଲା ନାହିଁ। ତେଣୁ ଏ ୨ ବର୍ଷ ମଧ୍ୟରେ ମୁଁ ଅନୁଭବ କଲି ଯେ ଦଳକୁ ବୋଧହୁଏ ଆଉ ମୋର ଆବଶ୍ୟକତା ନାହିଁ। ତେଣୁ ସମ୍ମାନର ସହିତ ଦଳର ବାହାରି ଯିବା ଲାଗି ନିଷ୍ପତ୍ତି ନେଲି।’

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।