ଡି’ ଲିଙ୍କ୍‌: ଭୋଲା ଭଗତକୁ ୫ ଦିନ ରିମାଣ୍ଡରେ ନେଲା କମିଶନରେଟ୍ ପୋଲିସ୍

କଟକ: ଉତ୍ତର ପ୍ରଦେଶର କାନପୁରରୁ ଗିରଫ ଧଳସାମନ୍ତ ଭ୍ରାତାଙ୍କ ଘନିଷ୍ଠ ସହଯୋଗୀ ଭୋଲା ଭଗତକୁ ୫ ଦିନ ରିମାଣ୍ଡରେ ନେଲା କମିଶନରେଟ୍‌ ପୋଲିସ।  ଚୌଦ୍ୱାର ଜେଲରୁ ଭୋଲାକୁ ଅଣାଯାଇ ଆଜି ମାରାଥନ୍ ଜେରା କରାଯାଉଛି। ଗତକାଲି ଭୋଲାକୁ ୫ ଦିନ ରିମାଣ୍ଡରେ ନେବା ପାଇଁ କଟକ ଏସଡିଜେଏମ୍ କୋର୍ଟ  ପୋଲିସକୁ ଅନୁମତି ଦେଇଥିଲେ।

ଓମ୍‌ ଓ ଦୀପୁ ହତ୍ୟାକାଣ୍ଡରେ ଭୋଲାର ଲିଙ୍କ ଥିବା ନେଇ ଜେରା ବେଳେ ସୂଚନା ମିଳିଛି। ଡି’ ବ୍ରଦର୍ସଙ୍କ ଟେଣ୍ଡର ଫିକ୍ସିଂ ଭୋଲା ଜରିଆରେ ହେଉଥିବାର ପ୍ରମାଣ ମିଳିଛି। ସିଏମ୍‌ସିର ସଫେଇ କାମ ନେଇଥିବା ରାମକୀ ସଂସ୍ଥାଠାରୁ ଭୋଲା ମାଧ୍ୟମରେ ହିଁ ମାସିକ ୩ରୁ ୪ ଲକ୍ଷ ଟଙ୍କା ଡି’ ବ୍ରଦର୍ସଙ୍କ ପାଖକୁ ଯାଉଥିଲା। ଟେଣ୍ଡର ହାତେଇବା ଓ ସୁରକ୍ଷା ବାବଦକୁ କୋଟି କୋଟି ଟଙ୍କା ଭୋଲା ମାଧ୍ୟମରେ ଆଦାୟ କରାଯାଉଥିଲା। ୧୯୯୯ ମସିହାରୁ ଡି’ ବ୍ରଦର୍ସଙ୍କ ସହ ଭୋଲାର ସମ୍ପର୍କ ଥିଲା। ଦୁଇଭାଇଙ୍କ ଗିରଫଦାରୀ ପରେ ସେ ଫେରାର ହୋଇଯାଇଥିଲା। ଫୋନ ଟ୍ରକ୍‌ କରି କମିଶନରେଟ୍‌ ପୋଲିସ ତାକୁ ଉତ୍ତରପ୍ରଦେଶର କାନପୁରରୁ ଗିରଫ କରିଥିଲା। ଆହ୍ଲାବାଦ ଏସ୍‌ଆର୍‌ପି ସହାୟତାରେ କମିଶନରେଟ୍ ପୋଲିସ୍‌ର ଏକ ସ୍ୱତନ୍ତ୍ର ଟିମ୍ ତାକୁ ଗିରଫ କରିବାରେ ସଫଳ ହୋଇଥିଲା।

ଡି’ବ୍ରଦର୍ସଙ୍କ ଅପରାଧିକ କାର୍ଯ୍ୟକଳାପର ତଦନ୍ତ ବେଳେ ଭୋଲାଙ୍କ ସଂପର୍କରେ ଅନେକ ଗୁରୁତ୍ୱପୂର୍ଣ୍ଣ ତଥ୍ୟ ମିଳିଥିଲା। ଧଳସାମନ୍ତ ଭ୍ରାତାଙ୍କ ସହ ମିଶି ଭୋଲା ବିଭିନ୍ନ ପ୍ରକାର ବ୍ୟବସାୟ କରୁଥିଲା। ଭୋଲା ଘରେ ଚଢାଉ ବେଳେ ଜବତ ହୋଇଥିବା କାର ଦୀପୁ ଓ ଓମ୍ ହତ୍ୟାକାଣ୍ଡରେ ବ୍ୟବହୃତ ହୋଇଥିବା ଜଣାପଡିଛି।