ଧଳସାମନ୍ତ ଭ୍ରାତାଙ୍କ ଦୁଇ ସହଯୋଗୀ ଗିରଫ; ୧୨ ଲକ୍ଷ ଟଙ୍କା, ୪ ବନ୍ଧୁକ ଓ ୧୬୦ ରାଉଣ୍ଡ ଗୁଳି ଜବତ

କଟକ: ଧଳସାମନ୍ତ ଭ୍ରାତାଙ୍କ ଅପରାଧ ସାମ୍ରାଜ୍ୟ ନେଇ ଖୋଳତାଡ଼ ଜାରି ରଖିଛି କମିଶନରେଟ୍ ପୋଲିସ୍। ଏହି ଘଟଣାରେ କଟକ ପୋଲିସ୍ ଧଳସାମନ୍ତ ଭ୍ରାତାଙ୍କର  ଦୁଇ ଜଣ ସହଯୋଗୀଙ୍କୁ ଗିରଫ କରିଛି। ସେମାନେ ହେଲେ ଭରତ ସ୍ୱାଇଁ ଓ ରାମ ଦାସ। ସେମାନଙ୍କ ଘର କଟକର ଚାଉଳିଆଗଞ୍ଜ ଅଞ୍ଚଳରେ। ସେମାନଙ୍କ ଘରୁ ପୋଲିସ୍ ଚାରିଟି ବନ୍ଧୁକ ଓ ୧୬୦ ରାଉଣ୍ଡ ଗୁଳି ଜବତ କରିଛି। ସେମାନଙ୍କଠାରୁ ୧୨ ଲକ୍ଷ ୪୪ ହଜାର ଟଙ୍କା ମଧ୍ୟ ଜବତ କରାଯାଇଛି। ସୋମବାର କଟକ ଡିସିପି ସଂଜୀବ ଅରୋରା ଏକ ସାମ୍ବାଦିକ ସମ୍ମିଳନୀରେ ଏହି ସୂଚନା ଦେଇଛନ୍ତି।

ଗତକାଲି ଅପରାହ୍ନରେ ପୋଲିସ୍ ଭରତ ଓ ରାମଙ୍କ ଘର ଉପରେ ଚଢ଼ାଉ କରିଥିଲା। ଦୀର୍ଘ ୭ରୁ ଆଠ ଘଣ୍ଟାର ସର୍ଚ୍ଚ ଅପରେସନ୍ ପରେ ପୋଲିସ୍ ଏ ସବୁ ଜିନିଷ ଜବତ କରିଥିଲା। ଏହା ସହିତ ଦୁଇ ଜଣଙ୍କୁ ଅଟକ ରଖି ପଚରାଉଚରା କରୁଥିଲା।

ଅନ୍ୟପକ୍ଷରେ ଅଧିକ ପଚରାଉଚରା ପାଇଁ ଆଜି ପୋଲିସ ଧଳସାମନ୍ତ ଭ୍ରାତା ଦ୍ୱୟ- ସୁଶାନ୍ତ ଓ ସୁଶୀଲଙ୍କୁ ରିମାଣ୍ଡରେ ନେଇ ପାରେ। ୧୦ ଦିନିଆ ରିମାଣ୍ଡ ପାଇଁ ପୂର୍ବରୂ କଟକ ଏସଡିଜେଏମ୍ କୋର୍ଟରେ କମିଶନରେଟ୍ ପୋଲିସ ଆବେଦନ କରିଥିଲା। ଆଜି ତା’ର ଶୁଣାଣି  ହେବ।