ସମ୍ ଅଗ୍ନିକାଣ୍ଡ ଘଟଣାରେ ମୁଖ୍ୟମନ୍ତ୍ରୀଙ୍କ ଇସ୍ତଫା ଦାବି କଲେ ଧର୍ମେନ୍ଦ୍ର

dharmendraଭୁବନେଶ୍ୱର: ସମ୍ ହସ୍ପିଟାଲ୍‌ରେ ଅଗ୍ନିକାଣ୍ଡରେ ୨୫ ଜଣଙ୍କ ମୃତ୍ୟୁ ଘଟଣାରେ କେନ୍ଦ୍ର ପେଟ୍ରୋଲିୟମ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମୁଖ୍ୟମନ୍ତ୍ରୀଙ୍କ ଇସ୍ତଫା ଦାବି କରିଛନ୍ତି। ମୁଖ୍ୟମନ୍ତ୍ରୀ ନୈତିକତା ଦୃଷ୍ଟିରୁ ଇସ୍ତଫା ଦେବା ଉଚିତ୍ ବୋଲି ସେ କହିଛନ୍ତି।

ଧର୍ମେନ୍ଦ୍ର କହିଛନ୍ତି,“ଏ ଘଟଣାରେ ମୁଖ୍ୟମନ୍ତ୍ରୀ ଚୁପ୍ କାହିଁକି ରହିଛନ୍ତି? ତାଙ୍କ ହାତରେ ଉଭୟ ଗୃହ ଓ ଅଗ୍ନିଶମ ବିଭାଗ ଅଛି। ଏ ଘଟଣା ପାଇଁ ତାଙ୍କୁ ଉତ୍ତରଦାୟିତ୍ୱ ନେବାକୁ ପଡ଼ିବ।”

ତେବେ ଧର୍ମେନ୍ଦ୍ରଙ୍କ ଏଭଳି ଦାବିକୁ ସମାଲୋଚନା କରିଛି ବିଜେଡି। ଦଳୀୟ ମୁଖପାତ୍ର ସୂର୍ଯ୍ୟ ନାରାୟଣ ପାତ୍ର କହିଛନ୍ତି,“ଧର୍ମେନ୍ଦ୍ର ପ୍ରଧାନ ସବୁ କଥାରେ ମୁଖ୍ୟମନ୍ତ୍ରୀଙ୍କ ଇସ୍ତଫା ଦାବି କରନ୍ତି। ମୁଖ୍ୟମନ୍ତ୍ରୀଙ୍କ ଇସ୍ତଫା ଦାବି ନ କରି ସେ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀଙ୍କ ଇସ୍ତଫା ଦାବି କଲେ ଭଲ ହୁଅନ୍ତା। କାରଣ ସମ୍ ହସ୍‌ପିଟାଲ୍ ଭଳି ଡାକ୍ତରଖାନାଗୁଡ଼ିକ ଏମ୍‌ସିଆଇ (ମେଡିକାଲ୍ କାଉନ୍‌ସିଲ୍ ଅଫ୍ ଇଣ୍ଡିଆ) ଅଧୀନରେ ରହିଛି। ଆଉ ଏମ୍‌ସିଆଇ ରହିଛି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀଙ୍କ ଅଧୀନରେ।”

ସୂଚନାଯୋଗ୍ୟ, ଏ ଘଟଣା ପାଇଁ ଗତକାଲି ସ୍ୱାସ୍ଥ୍ୟ ମନ୍ତ୍ରୀ ଅତନୁ ସବ୍ୟସାଚୀ ନାୟକ ନିଜ ପଦରୁ ଇସ୍ତଫା ଦେଇଥିଲେ। ନୈତିକତା ଦୃଷ୍ଟିରୁ ସେ ଇସ୍ତଫା ଦେଇଛନ୍ତି ବୋଲି କହିଥିଲେ। ସେହିପରି ସମ୍ ହସ୍ପିଟାଲ୍ ମାଲିକଙ୍କ ସମେତ ୫ ଜଣଙ୍କୁ ପୋଲିସ୍ ଗିରଫ କରିଛି।