ଖଣ୍ଡଗିରି: ରେଷ୍ଟୁରାଣ୍ଟରେ ବିସ୍ଫୋରଣ ଘଟି ୩ ମୃତ, ୪ ଆହତ

khandagiri_Fotor_Collageଭୁବନେଶ୍ୱର: ଖଣ୍ଡଗିରି ଅଞ୍ଚଳରେ ଥିବା ଏକ ସେଭେନ୍ ମାଇଲ୍ସ ରେଷ୍ଟୁରାଣ୍ଟରେ ଡିଜି ଜେନେରେଟର ଫ।ଟି ୩ ଜଣଙ୍କ ମୃତ୍ୟୁ ଘଟିଛି । ମୃତକଙ୍କ ମଧ୍ୟରେ ଦୁଇଜଣ ରେଷ୍ଟୁରାଣ୍ଟ କର୍ମଚାରୀ ଓ ଜଣେ ସିକ୍ୟୁରିଟି ଗାର୍ଡ ଅଛନ୍ତି। ଏହି ଘଟଣାରେ ଅନ୍ୟ ୪ ଜଣ ଆହତ ହୋଇଛନ୍ତି । ଆହତମାନଙ୍କୁ କ୍ୟାପିଟାଲ୍ ହସ୍ପିଟାଲରେ ଭର୍ତ୍ତି କରାଯାଇଥିଲା । ସେଠାରେ ସ୍ୱାସ୍ଥ୍ୟାବସ୍ଥା ଗୁରୁତର ହେବାରୁ ଜଣଙ୍କୁ କଟକ ବଡ ଡାକ୍ତରଖାନା ଓ ଅନ୍ୟ ୩ଜଣଙ୍କୁ ଭୁବନେଶ୍ୱରର ବିଭିନ୍ନ ଘରୋଇ ହସ୍ପିଟାଲକୁ ସ୍ଥାନାନ୍ତର କରାଯାଇଛି। ଖବରପାଇ ଅଗ୍ନିଶମ ବିଭାଗ କର୍ମଚାରୀ ଓ ପୋଲିସ ଘଟଣା ସ୍ଥଳରେ ପହଞ୍ଚିଛନ୍ତି । ରିପୋର୍ଟ ଲେଖାଯିବା ପର୍ଯ୍ୟନ୍ତ ବିସ୍ଫୋରଣର କାରଣ ଜଣାପଡିନାହିଁ।

ପ୍ରତ୍ୟେକ୍ଷଦର୍ଶୀଙ୍କ କହିବା ଅନୁଯାୟୀ ସନ୍ଧ୍ୟା ପ୍ରାୟ ସାଢେ ୫ଟାରେ ରେଷ୍ଟୁରାଣ୍ଟ କ୍ୟାମ୍ପସ୍ ବାହାରେ କିଛି ଲୋକ ବାଣ ଫୁଟାଉ ଥିଲେ । ସେଥିରୁ କିଛି ନିଆଁ ଝୁଲ ଜେନେରେଟର ଉପରେ ପଡ଼ିଥିଲା। ଫଳରେ ଜେନରେଟରଟି ହଠାତ୍ ଜୋରରେ ଶବ୍ଦ କରି ଫ।ଟିଯାଇଥିଲା। ଫଳରେ ସେଠାରେ ଡ୍ୟୁଟିରେ ଥିବା ଜଣେ ସିକ୍ୟୁରିଟି ଓ ଅନ୍ୟ ଦୁଇଜଣ କର୍ମଚାରୀଙ୍କର ମୃତ୍ୟୁ ଘଟିଥିଲା। ବିସ୍ଫୋରଣ ଏତେ ଶକ୍ତିଶାଳୀ ଥିଲା ଯେ ମୃତଦେହ ଖଣ୍ଡ ବିଖଣ୍ଡିତ ଅବସ୍ଥାରେ ଚାରିଆଡେ ପଡିଥିଲା। ବିସ୍ଫୋରଣ ପ୍ରଭାବରେ ରେଷ୍ଟୁରାଣ୍ଟର କାଚ ଭାଙ୍ଗିଯିବା ସହ ଆଖପାଖ ଘରରେ ଝରକା କାଚ ମଧ୍ୟ ଭାଙ୍ଗିଯାଇଥିବା ଦେଖିବାକୁ ମିଳିଛି।